Илъэс 15 зыныбжь спортсменкэу Камила Валиевам Пекин щыкIогъэ Олимпиадэм фигурнэ катаниемкIэ апэрэ чIыпIэр къызэрэщимыхьыгъэр тикъэралыгъо имызакъоу, IэкIыб хэгъэгухэм ащыпсэухэрэми агу къеуагъ.

Апэрэ программэ кIэкIым зыхэлажьэм, ар апэ ишъыгъэхагъ, къыкIэлъыкIощтми къенэ­къокъухэрэм зэратекIощтым цIыфхэм яцыхьэ телъыгъ. Ау ащ къыкIэлъыкIогъэ программэм хэукъоныгъэхэр щишIыгъэх, мылым щыцIанлъэзэ тефагъ… Ыпэ ишъыгъэхэр къыхэкIыгъэх, апэрэ чIыпIэ гъэшIогъищым язи къыхьыгъэп. Арэущтэу щытми, зэрэдунаеу фигурнэ катани­емкIэ ар анахь зэрэлъэшым цIыфхэр е­хъырэхъышагъэхэп, зыми ыгъэ­мысагъэп.

Олимпиадэм хамыгъэлэжьэн зэралъэкIыщтыгъэр, допинг Iоф­хэр къызэрэпаIэтыгъэр, зэнэкъо­къухэр къэмысызэ сыхьат пчъагъэрэ упчIабэ къызэрэратыгъэр пшъэшъэжъыем шIокъи­ныгъ ыкIи шIошъхьэкIуагъ.

Камилэ рагъэщэчыгъэ гукъа­ор къызыгурыIуагъэхэм ыкIи IэпыIэгъу къыфэхъугъэхэм зэу ащыщ Къэбэртэе-Бэлъкъар Рес­публикэм и ЛIышъхьагъэу, политикэу, бизнесменэу Къа­нэкъо Арсен. Фейсбукым щыриIэ нэкIубгъом ащ Камилэ фи­гъэхьыгъэ тхыгъэр къи- хьагъ.

«Пшъашъэм хэлъ талант иныр апэу зэрэдунаеу ащагъэшIэ­гъуагъ, нэужым агъэцIыкIугъ. СэрыкIэ Камилэ Олимпиадэм текIоныгъэр къыщыдихыгъ. Тефагъэми, къэтэджыжьыгъ. Ащ пытагъэу ыкIи щэIагъэу хэлъым апае янэ-ятэхэми, итренери «тхьашъуегъэпсэу» ясэIо.

Камилэ къинэу рагъэлъэгъугъэр фэзгъэпсынкIэнэу сыфай, икъарыу къихьажьынымкIэ сишIуагъэ езгъэкIы сшIоигъу. Камилэ янэ-ятэхэри игъусэхэу, ежь къыхихырэ уахътэм, зи­гъэпсэфынэу къалэу Шъачэ къесэгъэблагъэ», — къетхы А. Къанэкъом. Ахэм хьакIэщэу «Radisson коллекшн парадиз Сочи» зыфиIорэр къяжэ. ИщыкIагъэмэ, Камилэ зыхэфэгъэ хьал-балыкъым изэхэфын къыхэ­лэжьэным ар фэхьазыр.