Псэушъхьэхэр зыдэс вольерэу «Гъозэрыплъэ» бэмышIэу къащэгъэ домбай щырым джыри цIэ иIэп. Кавказ заповедникым ащ цIэу фаусыщтым икъыхэхын фэгъэхьыгъэу зэнэкъокъу зэхещэ.

БэмышIэу вольерым домбаеу Муникэ Приокскэ-Террасскэ заповедникым къыращи къыдагъэтIысхьагъ. Джы щыр цIыкIум зэреджэщтхэр къыхахыным фэшI цIыфхэм закъыфагъазэ.

Ар вольерым къыдэфэнэу зэрэхъугъэм къэбарэу пылъыми шъущыдгъэгъозэн. Илъэс фэдизкIэ узэкIэIэбэжьмэ, псэупIэу ХъымыщкIэй щыщхэм псыхъоу Шъхьэгуащэ къыщагъотыгъэ домбай цIыкIур Кавказ заповедникым иветеринар фахьыгъагъ. Ар зыхъугъэм тхьамэфитIу гор тешIэгъагъэр, псым бэрэ хэлъыгъ, хэпIыкIыхьэгъагъ. Псэушъхьэ щырым къарыу иIэжьыгъэп, псыхъом рихьыхыни ылъэкIыщтыгъ. Ар зыIэкIэхьагъэм лъэшэу ишIуагъэ ригъэ­кIыгъ, ыгъэшхагъ, ыIыгъыгъ, къарыу ригъэгъотыжьыгъ.

Ау цIыфхэм ясэгъэ домбаир заповедникым хэптIупщыхьэмэ бэрэ зэрэмыпсэушъущтыр гъэ­нэфэгъагъэ. Ары заповедникым ивольер дагъэтIысхьанэу зыкIырахъухьагъэр.

Мы лъэхъаным ар зыми щыщынэжьырэп, цIыфхэр благъэу къыкIэрэхьэх, фэсакъых, ищыкIагъэр рагъэгъоты.

Заповедникым итарихъ угу къыгъэкIэу цIэр аусынэу фаех ащ иIофышIэхэр. Ежьхэм къыхахыгъэу цIыфхэр зыхагъадэ­хэрэм ащыщых цIэхэу Кавказ, Бодо, Ермыш, Найденыш зыфиIохэрэр. Ахэм ямылъытыгъэу, хэти цIэу къыхихыщтым фит. Тыгъэгъазэм и 17-м нэс цIэхэр Кавказ заповедникым иофициальнэ аккаунтэу Инстаграм е Телеграм зыфиIохэрэм агъэ­хьынэу щыт. Домбай цIыкIум цIэу къыфыхахыщтыр ЧIыгум и Мафэу гъэтхапэм и 20-м хагъэунэфыкIыщтым нэс зэкIэми арагъэшIэщт.