Коронавируснэ инфекциемкIэ сымаджэхэм япчъагъэ къызэреIыхыгъэм ыкIи эпидемиологие лъэныкъомкIэ Iофхэм язытет нахьышIу зэрэхъугъэм къахэкIэу ковидым ыпкъ къикIэу агъэнэфэгъэгъэ шапхъэхэм къакIегъэчыгъэным фэгъэхьыгъэ унашъо Адыгеим щаштагъ. Адыгэ Республикэм и ЛIышъхьэу КъумпIыл Мурат ащ фэгъэхьыгъэ Указым кIэтхэжьыгъ.

Гъэтхапэм и 11-м къыщегъэжьагъэу кинотеатрэхэм, кафехэм, ресторанхэм, спорт учреждениехэм, культурэм къыхиубытэрэ псэуалъэхэм, хьакIэщхэм, зыгъэпсэфыпIэ унэхэм ачIахьэхэ зы­хъукIэ QR-кодхэр арагъэлъэгъунхэр ищыкIэгъэжьыщтэп.

Спортивнэ ыкIи культурнэ Iофтхьабзэхэм, общественнэ транспортым иIоф­шIэн япхыгъэу агъэнэфэгъэгъэ шапхъэ­хэри къырагъэIыхыщтых. ЦIыф­хэр жъугъэу зыхэлэжьэхэрэ Iофтхьабзэхэм, культурэм, спортым, зыгъэпсэфыным япхыгъэ псэуалъэхэм нэбгырэ пчъагъэу якIолIэщтхэмкIи гъунапкъэу агъэнэфэгъагъэхэр тырахыжьых.

ПэIудзыгъэ шIыкIэм тетэу Iоф ашIэным пае шапхъэу агъэнэфэгъагъэхэри тырахыжьых. Ау илъэс 60-м шIокIыгъэхэу вакцинэ зыхязымыгъэлъхьагъэхэм апае «самоизоляцием ирежимэу» агъэнэфэгъагъэр къэнэжьы. Джащ фэдэу ыпэкIэ зэрэщытыгъэм фэдэу цIыфхэр зэпэчыжьэу щытынхэ, нэгуихъохэри аIу­лъынхэ фаеу щыт.

Шъугу къэтэгъэкIыжьы: республикэм и ЛIышъхьэ ыпэкIэ пшъэрылъ къыгъэуцугъагъ цIыфхэм ядиспансеризацие, анахьэу ковидыр къызэутэлIэгъагъэхэм, анаIэ тырагъэтынэу.

АР-м и ЛIышъхьэ ипресс-къулыкъу