Хэбзэгъэуцугъэм фашIыгъэ зэхъокIыныгъэхэм мэхьанэшхо яI
Инфляцием зэрарэу къыздихьырэм къыкIегъэчыгъэнымкIэ, хэгъэгум товар къыщыдэзгъэкIхэрэм IэпыIэгъу афэхъугъэнымкIэ, IэкIыб къэралыгъохэм ащагъэфедэрэ технологиехэм афэдэхэм тихэгъэгу зыщягъэушъомбгъугъэнымкIэ пшъэрылъхэу Урысые Федерацием и Президентэу Владимир Путиным къыгъэуцугъэхэр зэрагъэцакIэхэрэм бэмышIэу щыIэгъэ планернэ зэIукIэм КъумпIыл Мурат къащытегущыIагъ.
Федеральнэ законэу N 44-р зытетым фашIыгъэ зэхъокIыныгъэхэр щыIэныгъэм щыпхырыщыгъэнхэмкIэ Iофтхьэбзэ гъэнэфагъэхэр республикэм щызэрахьэх. А зэхъокIыныгъэхэм адиштэу къэралыгъо заказхэмкIэ авансхэр къаратызэ ашIыщт. Ащ ишIуагъэкIэ тихэгъэгу товархэр къыщызыхьыжьхэрэм IэпыIэгъу афэхъунхэ, лъэпкъ проектхэмрэ къэралыгъо программэхэмрэ агъэцэкIэнхэ алъэкIыщт.
«Пандемием илъэхъан унашъохэр псынкIэу тштэхэу, мэхьанэшхо зиIэ пшъэрылъхэр дгъэцакIэхэу, социальнэ псэуалъэхэр ипIалъэм дгъэпсыхэу зедгъэсагъ. А опытыр непи икъоу къызфэдгъэфедэн, инфляцием зыкъимыIэтыным гъунэ лъытфын фае. Федеральнэ хэбзэгъэуцугъэм фашIыгъэ зэхъокIыныгъэхэр псынкIэу къыдэшъулъытэх, контрактхэмкIэ аванс яшъутын зэрэшъулъэкIыщтыр икъоу къызфэжъугъэфед, псэуалъэхэм ягъэпсынкIэ ыкIи ягъэцэкIэжьынкIэ ищыкIэгъэ псэолъапхъэхэр къэшъущэфых. ЗэкIэ итхъухьэрэр щыIэныгъэм щыпхырытщын фае. Гъэпсын Iофхэм цIыфхэр чанэу къахэжъугъэлажьэх. ТызэдеIэжьмэ ары ныIэп кIэухышIухэм такъыфэкIон зытлъэкIыщтыр», — къыIуагъ КъумпIыл Мурат.