ШIушIэ IэпыIэгъур афащэ
Адыгэ Республикэм и ЛIышъхьэу КъумпIыл Мурат кIэщакIо зэрэфэхъугъэм тетэу Донбасс щыпсэухэрэм къафаугъоигъэ шIушIэ IэпыIэгъур тыгъуасэ ращэжьагъ.
«Единэ Россием» ипроект диштэу Адыгеим исхэм нахьыбэрэ агъэфедэрэ пкъыгъохэр, гъомылэпхъэ зэфэшъхьафхэр: хьаджыгъэр, пынджыр, тыгъэгъэзэ дагъэр, къуаер, псыр, IэшIу-IушIухэр ыкIи нэмыкIхэр зыхэхьэрэ шIушIэ IэпыIэгъу тонн 12 фэдиз аугъоигъ.
МЧС-м иIофышIэхэр ягъусэхэу Ростов хэкум ахэр машинитIукIэ нагъэсыщтых. ЕтIанэ Урысыем и МЧС иколоннэ хэтхэу ахэр Донбасс ащэщтых.
«ТхьамыкIагъо къызэхъулIагъэхэм бэдэд афэгумэкIырэр. Адыгеим исхэри, волонтерхэри, предпринимательхэри шIушIэ Iофтхьабзэхэм чанэу ахэлажьэх. Партиеу «Единэ Россиер» кIэщакIо зэрэфэхъугъэм тетэу гуманитар IэпыIэгъур зыщаугъоирэ чIыпIэхэр къызэIуахыгъэх. Нахьыбэрэ агъэфедэрэ пкъыгъохэр цIыфхэм а чIыпIэхэм арахьылIэх. Донбасс дэсхэу тхьамыкIагъом хэфагъэхэми, зышъхьэ къезыхьыжьэжьыгъэхэми адеIэ зышIоигъохэм ренэу зэрахахъорэр гушIуагъоу щыт», — къыIуагъ КъумпIыл Мурат.