Украинэм щыпсэурэ цIыф къызэрыкIохэм ящынэгъончъагъэ къэу­хъумэгъэным фэIорышIэрэ хэушъхьафыкIыгъэ дзэ операциер зэрэрагъэжьагъэр игъо шъыпкъэу елъытэ ветеранхэм (пенсионерхэм) яобщественнэ организацие и Мыекъопэ къэлэ отделение итхьаматэу Юрий Томчак.

— Илъэс 40-рэ дзэ къулыкъум сызэрэхэтыгъэм къыхэкIэу къэсIон: хэ­ушъхьафыкIыгъэ дзэ операциер Украинэм щырагъэжьэнымкIэ УФ-м иглавнокомандующэу Владимир Путиным игъо шъыпкъэу унашъо ышIыгъ. Пре­зидентым сэри десэгъаштэ, сыдигъуи урысхэмрэ украинцэхэмрэ зы лъэпкъэу щытыгъэх. Тилъэпкъ изы Iахь гумэкIыгъо зэрэхэтым теплъэу, ар зэшIохыгъэнымкIэ зи тымышIэу тыщы­сышъущтэп. УФ-м зыкъэухъумэжьыгъэнымкIэ и Министерствэ къызэритыгъэмкIэ, хэушъхьафыкIыгъэ дзэ операциер рахъухьэгъэ планым тетэу макIо. Ащ дакIоу Украинэм ипащэхэм зэдэгущыIэгъухэр адашIых. Мамырныгъэ хэлъэу хъугъэ-шIагъэр зэшIохыгъэ­нымкIэ мы лъэбэкъухэм яшIуагъэ къэкIонэу тэгугъэ. ЛъэныкъуитIу зэдэгущыIэгъухэм яшIуагъэкIэ акъылыгъэ зыхэлъ екIолIакIэ къызагъотыкIэ, хэушъхьафыкIыгъэ дзэ операциер аухыщт. Арэущтэу зыхъукIэ, интернациональнэ мамыр щыIакIэу Украинэм илъыгъэр цIыфхэм агъэпсыжьыщт, — къыIуагъ Юрий Томчак.

Iэшъынэ Сусан.