Пандемиер тыухыным тыпэчыжь
Псауныгъэр къэухъумэгъэнымкIэ Дунэе организацием (ВОЗ-м) и Генеральнэ пащэу Тедрос Гебрейесус къызэриIуагъэмкIэ, коронавирусым ипандемиеу дунаир зэлъызыубытыгъэр тыухыпэным джыри тыпэчыжь.
— Коронавирусыр зэфэдэу тыди зыщамыгъэуцукIэ, бэрэ тигъэгумэкIыщт, — еIо Гебрейесус.
Джащ фэдэу ВОЗ-м ипащэ къызэрэхигъэщыгъэмкIэ, вирусым изэмылIэужыгъуагъэ зызеблэхъу ыкIи зеушъомбгъу. Пандемиер къызежьагъэм къыщыублагъэу нэбгырэ миллиони 6-м ехъурэмэ ядунай ахъожьыгъ.
Коронавирусыр псынкIэу тпэкIэкIынымкIэ, уз гъэтIылъыгъэхэр хэтымыхынхэмкIэ, зидунай зыхъожьыхэрэм япчъагъэ къыщыкIэнымкIэ зишIуагъэ къэкIощтыр вакцинациер ары.
Шъугу къэдгъэкIыжьын, Адыгеим вакцинациер чIыпIэ 32-мэ ащашIы. Ащ ыпкIэ ахэлъэп, вакцинэхэр икъоу къаIэкIэхьэх. АР-м псауныгъэр къэухъумэгъэнымкIэ и Министерствэ къызэритыгъэмкIэ, вакцинэхэр зэпымыоу къаIэкIэхьанхэмкIэ санкциеу Урысыем къытыралъхьагъэхэм яягъэ къэкIощтэп —ахэр зэкIэ Урысыем щатхыгъэх ыкIи къыщыдагъэкIых.