Мэхьанэшхо зиIэ къулыкъу

2008-рэ илъэсым УФ-м и Президент и УнашъокIэ мы мафэр агъэнэфагъ.

Гъэтхапэм и 11-р къызкIыхахыгъэм лъапсэ имыIэу щытэп. 2003-рэ илъэсым, мы мафэм Урысыем и Президент и Унашъоу «Вопросы совершенствования государственного управления в РФ» зыфиIорэм хахьэу наркоманием ыкIи наркотикхэр хэбзэнчъэу къезыгъэкIо­кIыхэрэм апэуцужьыгъэнымкIэ хэушъхьа­фыкIыгъэ къулыкъу агъэпсыгъ.

Илъэс зэкIэлъыкIохэм къулыкъум ыцIэ пчъагъэрэ зэблахъугъ, ау иIофшIэн зыфэгъэхьыгъагъэр зэхъокIыгъэп.

Наркотикхэр хэбзэнчъэу къызэрэрагъэкIокIыхэрэм епхыгъэ хъугъэ-шIагъэхэм апкъ къикIэу мы аужырэ илъэсхэм цIыфхэм ясоциальнэ, экономикэ Iофыгъохэр ыкIи яшIыкIэ-зекIуакIэхэр зэщыкъуагъэ зэрэхъугъэм щынагъо къеты, къэралыгъом ищынэгъончъагъэ къыкIырегъэчы, цIыфэу наркотикхэм апыщагъэ­хэм, ахэм ягупсэхэм ящыIэныгъэ екъутэ. Наркотикыр зыгъэфедэхэрэм япсауныгъэ ыкIи ящыIэныгъэ зэщыкъуагъэ зэрэхъу­рэр зэкIэми ашIэ, арэу щытми, ащ къыгъэуцухэрэп.

АР-м хэгъэгу кIоцI IофхэмкIэ и Министерствэ наркотикхэр къызэрэрагъэ­кIокIыхэрэм лъыплъэгъэнымкIэ иотдел ипащ Нэфышъэ Рустам. Ащ къызэриIуа­гъэмкIэ, наркотикхэм япхыгъэ гумэкIыгъор анахь Iофыгъо шъхьаIэу министерствэм ыпашъхьэ итхэм ащыщ. Наркотик зыхэлъ пкъыгъохэр республикэм къизыхьэхэрэр къэубытыгъэнхэр, ахэр Iу­зы­гъэкIыхэрэм ыкIи зыгъэфедэхэрэм уголовнэ пшъэдэкIыжь ягъэхьыгъэныр, мы лъэныкъомкIэ бзэджашIэхэм якъы­хэгъэщын фэгъэзэгъэ подразделениехэм яIофшIэн мониторинг шIыгъэныр отделым ипшъэрылъ шъхьаIэхэм ащыщ. Ащ зэрилъытэрэмкIэ, наркотикхэр хэбзэнчъэу къызэрэрагъэкIокIыхэрэр цIыфхэмкIэ, къэралыгъо хабзэмкIэ ыкIи ащ епхы­гъэу лажьэрэ ведомствэхэмкIэ гумэкIыгъо­шхоу щыт. Мыщ епхыгъэ бзэджэшIагъэ­хэр ыкIи хэбзэукъоныгъэхэр пэшIорыгъэшъэу къыхэгъэщыгъэнхэм ишIогъэ­шхо къызэрэкIорэр гъэнэфагъэ.

АР-м хэгъэгу кIоцI IофхэмкIэ и Министерствэ хэбзэухъумэкIо ыкIи хэбзэ гъэцэкIэкIо къулыкъухэр игъусэхэу наркоманием епхыгъэ бзэджэшIагъэхэм ябэныгъэнымкIэ оперативнэ-лъыхъун ыкIи пэшIорыгъэшъ Iофтхьабзэхэр зэрахьэх. Анахьэу анаIэ зытырагъэтырэр наркотикхэм якъэкIуапIэхэр зэфэшIыгъэн­хэр ыкIи наркотик зыхэлъ пкъыгъохэр хэбзэнчъэу республикэм къыщемыгъэ­кIокIыгъэнхэр ары.

УФ-м инаркокъулыкъу иIофышIэхэм ямэфэкIкIэ тафэгушIо, псауныгъэ пытэ ыкIи щыIэкIэшIу яIэнэу, ягупсэхэм адатхъэхэу щыIэнхэу тафэлъаIо. КIАРЭ Фатим.