Проектэу «Малая Родина. Книга Памяти» зыфиIорэм ПсышIопэ районыр чанэу хэлажьэ. Президентым иунашъо рыгъуазэхэзэ зэрэкъэралыгъоу лъыхъон Iофтхьабзэхэр ащэкIох, Хэгъэгур къэзыгъэгъунэгъэ пстэумэ ацIэхэр къагъотыжьынхэм пылъых.

Роберт Рождественскэм ипоэмэ цIэ­рыIоу «Реквием» зыфиIорэм исатырхэу макIэу зэблэтхъугъэхэу, «Вспомним всех поименно, горем вспомним своим… Это нужно не мертвым, это нужно живым! Вспомним гордо и прямо всех погибших в борьбе…» зыщиIохэрэр бэшIагъэ тыгу къызыдгъэкIыжьынхэ фэягъэр, — къы­Iуагъ ПсышIопэ районым иветеранхэм я Совет итхьаматэу Лидия Бойко. —Джырэ лъэхъаным дунаим къытехъухьэ­рэр къыдэтлъытэмэ, Хэгъэгу зэошхом ишIэжь зэрэдгъэлъапIэрэр зыгу къытфэмышIу хэгъэгухэм агъэкIодынэу, хъугъэ шъыпкъэр агъэбылъынэу зэрэфаехэр ахэм къахэщы.

А шъыпкъэр зищыкIагъэхэр, тэ, псаухэр, ары, къэзымыгъэзэжьыщтхэр арэп…

ИкIыгъэ илъэсым мэкъуогъум и 22-р ары ТАСС-м ипресс-къулыкъу проектэу «Малая Родина. Книга Памяти» зыфиIо­рэм лъэтегъэуцо зыщыфашIыгъагъэр. Хэгъэгу зэошхом хэкIодагъэхэу, зикъэбар тымышIэхэрэм зэкIэми ацIэхэр къэдгъо­тыжьынхэр ары проектым пшъэрылъэу иIэр. Ар Iоф псынкIагъоп. Заом ыкIи ащ хэтыгъэхэм афэгъэхьыгъэу тхыгъэу щыIэр бэдэд. Ахэм Iоф адэшIэгъэн фае. Зэо лъэхъаным къыхэфэгъэ зэошхохэр, ахэм ахэтыгъэхэр, бгъэхалъхьэ къызэратыгъэ­хэр, дзэкIолIэу фэхыгъэхэр зыщагъэтIылъыжьыгъэхэр къахэбгъэщыжьынхэм охътабэ ищыкIагъ. ШIэжьым иэлектроннэ тхылъ гъэхьазырыгъэнымкIэ IэпыIэгъу къафэхъущтых Урысые Федерацием зыкъэухъумэжьыгъэнымкIэ и Министерствэ икъэбар угъоигъэхэр, электроннэ порталхэу «Память народов», «Подвиг народа» зыфиIохэрэр, «Мемориалым» ыкIи Краснодарскэ краим иэлектроннэ тхылъэу «Книга Памяти» зыфиIорэм къащыугъоигъэ тхыгъэхэр.

ШъачэкIэ проектым игъэцэкIэн къыхэ­лажьэхэрэм ащыщых къэлэ, район, чIыпIэ администрациехэр, ветеранхэм, ныбжьыкIэхэм яорганизациехэр, музейхэм, тхылъеджапIэхэм яIофышIэхэр, нэмыкIхэри.

ПсышIопэ районым иадминистрацие къызэрэщытаIуагъэмкIэ, ШIэжьым и ТхылъыкIэу агъэхьазырыщтым зыцIэ мыкIодыжьынэу къыдэхьащтхэм дзэ къулы­къушIэхэр, партизанхэр, фаехэу заом дэкIыгъагъэхэр, къауIагъэхэу зыпсэ хэкIыгъэхэр, гъэрэу аштэгъагъэхэр, конц­лагерьхэм адэсыгъэхэр ащыщых.

Ахэм къарыкIогъэ шъыпкъэр зэбгъэшIэным пае яIахьылхэу псаухэм къаIо­тэжьыхэрэр, заом щатырахыгъэгъэ су­рэтхэр, къатхыгъэгъэ письмэхэр, зышIэщтыгъэхэ цIыфхэм ягукъэкIыжьхэр къэу­гъоижьыгъэнхэ фае. ТапэкIэ студентхэм, кIэлэеджакIохэм, краеведхэм, музейхэм, культурэм иунэхэм зэIуагъэкIэгъэгъэ къэбар пстэумэ яшIуагъэ къэ­кIощт. Мары къуаджэу Головинкэ щыпсэущтыгъэхэм якъэбархэр, заом щыIагъэхэм, IофшIэным щыпэрытыгъэхэм, нэмыкIхэми ягъэшIэ гъогу къырыкIуагъэр ащ дэсхэм ашIэх.

Хэгъэгу зэошхом ТекIоныгъэр къызыщыдахыгъэр илъэс 65-рэ зыщыхъугъэ илъэсым я 78-рэ еджапIэм икIэлэеджэкIо куп «ШIэжьым и Тхылъ» ыIоу, еджапIэм IукIыхи заом кIогъагъэхэм якъэбархэр къызщыраIотыкIырэ тхыгъэ агъэхьазырыгъагъ. Ащ Урысые зэнэкъокъоу «Сохраним память о ветеранах и защитниках нашего Отечества» зыфиIорэм шIухьафтын къыщихьыгъагъ.

ШIэжь Тхылъхэм якъыдэгъэкIынкIэ шапсыгъэхэм я Адыгэ Хасэ ишIуагъэ къегъакIо. Апэрэр 1994-рэ илъэсым къыда­гъэкIыгъ. ИлъэсипшI текIыгъэу хэхъоныгъэхэр фашIыгъэу ятIонэрэу «ШIэжьым и Тхылъ» къытырадзагъ.

Адыгэ Хасэм итхьаматэу КIакIыхъу Мэджыдэ къызэриIуагъэмкIэ, «ШIэжьым и Тхылъхэр» бзэмыIу шIэжьэу ныбжьыкIэхэм къафыщытынэрэ тхылъых. Апсэ ати шъхьафитныгъэр къэзыухъумэгъэ лIэужым фэгъэхьыгъэ тхылъых. Ныбэ Анзор.