Адыгэ Республикэм иминистрэхэм я Кабинет изэIукIэу Адыгеим и ЛIышъхьэу КъумпIыл Мурат тхьамэтагъор зыщызэрихьагъэр республикэм и Правительствэ зычIэт унэм тыгъуасэ щыкIуагъ. Лъэпкъ программэхэр, республикэм хэхъоныгъэ зэришIыщт унэе программэр, республикэ бюджетыр зэрагъэцакIэхэрэм мыщ щатегущыIагъэх.

КъумпIыл Мурат инфляцием нахь макIэу зэрар арихынымкIэ, чIыпIэхэм товархэр къащыхьы­жьыгъэнхэмкIэ Урысые Федерацием и Президентэу Владимир Путиным пшъэрылъэу афишIыгъэхэр зэрагъэцакIэрэм ынаIэ тыригъэтыгъ.

АР-м и Премьер-министрэ ипшъэрылъхэр зыгъэцакIэу КIэрэщэ Анзаур къызэриIуагъэм­кIэ, лъэпкъ проектхэм ягъэцэкIэн пае мыгъэ сомэ миллиарди 5,4-м ехъу къыхагъэ­кIыщт, лъэпкъ проектхэмкIэ зэзэгъыныгъэхэр джыдэдэм процент 53,5-м нэсыгъ. Адыгэ Респуб­ликэм социальнэ-экономикэ хэхъоныгъэ егъэшIыгъэнымкIэ унэе программэм ипроектхэмкIэ зэзэгъыныгъэхэр процент 50-м ехъугъэх.

АР-м псауныгъэр къэухъу­мэгъэнымкIэ иминистрэу Мэрэтыкъо Рустем зэIукIэм къызэрэщиIуагъэмкIэ, зэпыу имыIэу Iэ­зэгъу уцхэр къаIэкIагъэхьанхэм фэшI зэзэгъыныгъэхэр ада­шIы­гъэх, псауныгъэм икъэу­хъу­мэн фэгъэзэгъэ псэолъи 10-мэ ягъэ­цэкIэжьынкIэ е ягъэ­псынкIэ планхэр агъэцэкIэщтых. Поликлиникэм ишIын Мыекъуапэ щылъа­гъэкIуатэ. Каменномостскэ да­шIыхьэрэ поликлиникэмкIэ под­рядчикыр IофшIэнхэм афежьагъ.

АР-м финансхэмкIэ и Ми­нистерствэ къызэритыгъэмкIэ, мы илъэсым иапэрэ мэзитIу зэхэугъо­егъэ бюджетым хэбзэIахь, мыхэбзэIахь хахъохэу сомэ миллиарди 2-рэ миллиони 167-рэ къихьагъ. ГъэрекIо мыщ фэдэ иуахътэ егъэп­ша­гъэ­мэ, ар проценти 130,1-рэ мэхъу.

«Бизнес цIыкIумрэ гурытымрэ яIахьэу экономикэм хашIыхьэрэр нахьыбэ зыхъукIэ, сыд фэдэрэ санкциехэми тыкъагъэщтэщтэп. Предпринимательствэ цIыкIумрэ гурытымрэ Iэпы­Iэгъу зэраратырэ амал­хэр икъоу къызфэтэ­жъугъэгъэфедэх», — къы­Iуагъ КъумпIыл Мурат.

АР-м экономикэ хэхъоныгъэ­мрэ сатыумрэкIэ иминистрэу Шэуджэн Заур зэIукIэм зэрэщыхигъэунэфыкIыгъэмкIэ, гъо­мы­лап­хъэхэмрэ нахьыбэрэ агъэ­федэрэ товархэмрэ ауасэ къамы­Iэтыным мафэ къэс гъунэ лъафын, тхьаумэфэ мафэхэм ермэлыкъхэр зэхащэхэзэ ашIын фае.

«Пандемием илъэхъан унашъохэр псынкIэу тштэнэу, мэхьанэшхо зиIэ пшъэрылъхэр дгъэцакIэхэу, ипIалъэм къыпэу социальнэ псэуалъэ­хэр дгъэпсынэу зедгъэ­сагъ. А опытыр непи икъоу къызфэдгъэфедэн, итхъухьэхэрэр зэкIэ щыIэныгъэм щыпхырытщынхэ фае. Гъэп­сын IофшIэнхэм чIыпIэрысхэр къахэжъугъэлажьэх. ТызэдеIэжьмэ ары ныIэп кIэухышIухэм такъы­фэкIон зытлъэ­кIыщтыр», — къыIуагъ КъумпIыл Мурат.

АР-м и ЛIышъхьэ ипресс-къулыкъу