Гъэтхапэм и 10-р — Адыгэ Республикэм и Конституцие и Маф
Адыгэ Республикэм щыпсэухэу лъытэныгъэ зыфэтшIыхэрэр!
Адыгэ Республикэм и Конституцие и Мафэ фэшI тышъуфэгушIо!
1995-рэ илъэсым гъэтхапэм и 10-м аштэгъэ Конституциер Урысые Федерацием инэмыкI шъолъырхэм яфитыныгъэхэм афэдэхэр зиIэ Адыгэ Республикэм иполитическэ, иэкономическэ ыкIи иправовой системэ лъапсэ фэхъугъ, тиреспубликэ иобщественнэ-политикэ зыпкъитыныгъэрэ исоциальнэ-экономикэ хэхъоныгъэрэкIэ амалышIухэр къытыгъэх.
Илъэсэу къызэтынэкIыгъэхэм Закон ШъхьаIэм шIуагъэу къытыгъэр нафэ къэхъугъ, цIыф лъэпкъ зэфэшъхьафыбэмэ къахэкIыгъэхэу Адыгеим щыпсэухэрэм мамырныгъэрэ зэгурыIоныгъэрэ азыфагу илъэу зэдэпсэухэмэ зэрашIоигъор нахь нэрылъэгъу къытфэхъугъ.
Адыгеир джыри нахь зэтегъэпсыхьагъэ хъунымкIэ, Урысыем ыкIуачIэ нахь пытэнымкIэ Конституцием къыдилъытэхэрэр гъэцэкIэгъэнхэм мэхьанэшхо зэриIэм тицыхьэ пытэ телъ.
ТичIыпIэгъу лъапIэхэр, зэкIэми тышъуфэлъаIо псауныгъэ пытэ, щыIэкIэшIу шъуиIэнэу, шъуигухэлъ дахэхэр къыжъудэхъунхэу, гъэхъэгъакIэхэр шъушIынхэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат Адыгэ Республикэм и Къэралыгъо Совет – Хасэм и Тхьаматэу Владимир Нарожный