Гъогухэм ящынэгъончъагъэкIэ ишIуагъэ къэкIощт
Адыгэ Республикэм къэралыгъо гъэпсыкIэ иIэ зыхъугъэм ия 100-рэ илъэс ехъулIэу Мыекъуапэ къэзыухьащт автомобиль гъогум иятIонэрэ чэзыу ишIын аухыгъ. Тыгъуасэ Iахьзэхэлъ обществэу «ДСУ-3-м» иавтомобильхэр апэрэу гъогукIэм рыкIуагъэх. Адыгеим и ЛIышъхьэу КъумпIыл Мурат Iофэу ашIагъэм икIэуххэм защигъэгъозагъ.
Гъогум иIахьыкIэ икъызэIухын къекIолIагъэх федеральнэ инспектор шъхьаIэу АР-м щыIэ Сергей Дрокиныр, псэолъэшIынымкIэ, транспортымкIэ, ЖК-мкIэ ыкIи гъогу хъызмэтымкIэ Адыгэ Республикэм иминистрэу Валерий Картамышевыр, Мыекъуапэ имэрэу Геннадий Митрофановыр, Адыгеяавтодорым ипащэхэр ыкIи нэмыкIхэр.
Адыгеим и ЛIышъхьэу КъумпIыл Мурат къызэрэхигъэщыгъэмкIэ, республикэм игъогу инфраструктурэ ихэхъоныгъэкIэ федеральнэ гупчэм IэпыIэгъоу къытырэм мэхьанэшхо иI.
«Урысые Федерацием и Президентэу Владимир Путиным гъогу хъызмэтым ихэхъоныгъэкIэ, лъэпкъ проектэу «Щынэгъончъэ гъогу дэгъухэр» зыфиIорэр пхырыщыгъэнымкIэ пшъэрылъхэр къыгъэуцугъэх. Федеральнэ IэпыIэгъум ишIуагъэкIэ ахъщэ тедзэхэр къызэрэтфыхагъэкIхэрэм елъытыгъэу республикэм игъогухэм язытет уахътэм диштэнымкIэ ыкIи Адыгеим ищыкIэгъэ псэолъэ шъхьаIэхэр шIыгъэнхэмкIэ пшъэрылъэу тапашъхьэ итхэр нахь псынкIэу зэшIотхынхэ тэлъэкIы. Ахэм зыкIэ ащыщ Мыекъуапэ къэзыухьэрэ гъогур», — къыхигъэщыгъ КъумпIыл Мурат. Автомобиль
гъогум икIыхьагъэ километрэ 27-рэ мэхъу. Гъогум иятIонэрэ чэзыу аухыгъ. Ящэнэрэ чэзыоу километри 7,5-рэ зикIыхьагъэм ишIын макIо. А гъогу Iахьри Адыгеим икъэралыгъо гъэпсыкIэ илъэси 100 зыщыхъурэм ехъулIэу аухыщт.
Адыгеим и ЛIышъхьэ шъолъыритIу хъурэ гъогум иIахьыкIэ изытет ыуплъэкIугъ. ПсэолъэшIхэм къызэраIуагъэмкIэ, техникэм къыдилъытэрэ шэпхъэ пстэуми ар адештэ.
КъумпIыл Мурат къызэриIуагъэмкIэ, республикэм инфраструктурэм иIофыгъохэм язэшIохын лъэшэу анаIэ щытырагъэты. Лъэпкъ проектэу «Щынэгъончъэ гъогу дэгъухэр» зыфиIорэр гъэцэкIэгъэнымкIэ республикэр анахь шъолъыр дэгъухэм ахэфагъ. «Тэ гухэлъ шъхьаIэу тиIэр гъогухэр щынэгъончъэу щытынхэр, уахътэм диштэрэ, цIыфхэмкIэ Iэрыфэгъоу щытыщт гъогухэр шIыгъэнхэр ары. А пстэуми яшIуагъэ къэкIощт зекIо къакIохэрэр нахьыбэ хъунхэмкIэ ыкIи инвестициеу республикэм къыIэкIахьэрэм хэхъонымкIэ», — къыхигъэщыгъ КъумпIыл Мурат.
АР-м и ЛIышъхьэ ипресс-къулыкъу
Сурэтхэр А. Гусевым тырихыгъэх.