Iэзэгъу уцхэм ауасэ гъунэ лъафыщт
Адыгеим и ЛIышъхьэу КъумпIыл Мурат аптечнэ организациехэм япащэхэм зэIукIэ тыгъуасэ адыриIагъ.
Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м псауныгъэр къэухъумэгъэнымкIэ иминистрэу Мэрэтыкъо Рустем, Адыгеим цIыфым ифитыныгъэхэм якъэухъумэнкIэ и Уполномоченнэу Анатолий Осокиныр, Росздравнадзорым АР-мкIэ ипащэу Шымыгъэхъу Айтэч, монополием пэшIуекIогъэнымкIэ Федеральнэ къулыкъум АР-мкIэ и ГъэIорышIапIэ ипащэу ХьапэкIэ Аслъан, нэмыкI ведомствэхэм япащэхэр ащ хэлэжьагъэх.
«Президентэу Владимир Путиным унэшъо тэрэз ыштагъэр. Охътабэ темышIэу Iофхэр зыпкъ иуцожьынхэу тэгугъэ. Урысыем непэ санкциешхохэр къырашIылIэх. 2014-рэ илъэсым хэбзэ къулыкъухэм санкциехэм апэшIуекIонхэу загъэсэгъагъ. Коронавирусым зыкъызештэ лъэхъанми IофшIэнхэр нэмыкIэу зэхащэхэ хъугъэ. Мы лъэхъэнэ мыпсынкIэр зэпачынымкIэ бизнесми, тицIыфхэми IэпыIэгъу тапэкIи тафэхъущт», — къыIуагъ КъумпIыл Мурат.
Республикэм и ЛIышъхьэ зэрэхигъэунэфыкIыгъэмкIэ, хэгъэгум ипащэхэм экономикэм зыкъезыгъэIэтыщт амалыкIэхэр зэрахьэх. Предпринимательствэ цIыкIумрэ гурытымрэ IэпыIэгъу зэрафэхъущтхэ апэрэ лъэбэкъухэр ашIыгъэх. Федеральнэ гупчэм игъоу ылъэгъухэрэр Адыгейми псынкIэу ыгъэфедэнхэ фае. Пшъэрылъ шъхьаIэхэм зэу ащыщыр предприятие мыинхэм IофшIэнымкIэ амалышIоу яIэхэр зэбламыхъунхэр ары.
«Тыдрэ лъэныкъуи, фармацевтикэми IофшIэныр ащыжъот. Iэзэгъу уцхэм ащымыкIэнхэмкIэ, ахэм ауасэ зыкъемыгъэIэтыгъэнымкIэ афэлъэкIыщтыр зэкIэ ашIэ. Республикэм исхэм ящыкIэгъэ Iэзэгъу уцхэр къызIэкIагъэхьанхэу амал яIэн фае», — къыIуагъ АР-м и ЛIышъхьэ.
КъумпIыл Мурат аптечнэ предприятиехэм япащэхэм къяджагъ цIыфхэмкIэ мэхьанэшхо зиIэ Iэзэгъу уцхэм ауасэ къамыIэтынэу. Росздравнадзорымрэ республикэм ипрокуратурэрэ Iэзэгъу уцхэм ауасэ хамыгъэхъонымкIэ уплъэкIунхэр ренэу зэхащэщтых. Монополием пэшIуекIогъэнымкIэ Федеральнэ къулыкъум Адыгэ РеспубликэмкIэ и ГъэIорышIапIи Народнэ фронтым ишъолъыр къутами ащкIэ къадеIэщтых.
Псауныгъэр къэухъумэгъэнымкIэ республикэм и Министерствэ къызэритыгъэмкIэ, аптечнэ организацие 227-рэ республикэм ит. Ахэм япащэхэм адэгущыIагъэх, Iэзэгъу уцхэм ауасэ лъэшэу ахагъэхъуагъэу непэкIэ къыхагъэщыгъэп.
АР-м и ЛIышъхьэ ипресс-къулыкъу