Шъолъыр программэм игъэцэкIэн
Зэхэоным нэсыгъэ унэхэм цIыфхэр къачIэщыжьыгъэнхэм тегъэпсыхьэгъэ шъолъыр программэр зэрагъэцакIэрэм зыщытегущыIэгъэхэ зэхэсыгъор тыгъуасэ Адыгэ Республикэм и ЛIышъхьэ и Ситуационнэ гупчэ щыкIуагъ. Адыгэ Республикэм и ЛIышъхьэу КъумпIыл Мурат ар зэрищагъ.
Зэхэсыгъом хэлэжьагъэх АР-м и Премьер-министрэ ипшъэрылъхэр зыгъэцэкIэрэ КIэрэщэ Анзаур, АР-м псэолъэшIынымкIэ, транспортымкIэ, ЖКХ-мкIэ и Министерствэ, АР-м финансхэмкIэ и Министерствэ, Адыгеяавтодорым, Стройзаказчикым, къалэу Мыекъуапэ, Кощхьэблэ, Мыекъопэ районхэм, Яблоновскэ къэлэ псэупIэм яадминистрациехэм япащэхэр.
АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэу Валерий Картамышевым зэхэсыгъом къызэрэщиIуагъэмкIэ, 2019 — 2025-рэ илъэсхэм нэбгырэ 438-рэ зычIэс фэтэрыбэу зэхэт унэ 29-у зэхэоным нэсыгъэхэр шъолъыр программэм хагъэхьагъэх. 2022-рэ илъэсым ипIалъэм къыпэу программэр ыгъэцэкIэнэу республикэм пшъэрылъ зыфишIыжьыгъ. Ащ изэшIохын сомэ миллион 292-рэ пэIухьащт.
Непэрэ мафэм ехъулIэу зэхэонкIэ щынагъоу щыт унэхэм нэбгыри 160-рэ къачIащыжьыгъ. Кощхьэблэ, Мыекъопэ районхэм программэр зэращагъэцакIэрэм фэгъэхьыгъэ Iофыгъом шъхьафэу зэхэсыгъом щыхэплъагъэх.
Илъэсыр имыкIызэ Кощхьэблэ районым щыпсэурэ унэгъо 51-р, Мыекъопэ районым щыпсэурэ унэгъо 75-р зэхэтэкъонкIэ щынагъоу щыт унэхэм къачIащыжьынхэ фае. 2022-рэ илъэсым тыгъэгъазэм и 1-м нахь мыгужъоу ащ фэдэ унэхэм цIыфхэр къачIэщыжьынхэу республикэм и ЛIышъхьэ ыгъэнэфагъ.
«Программэр загъэцэкIэн фэе пIалъэр заукъокIэ, ЖКХ-мкIэ федеральнэ Фондым ифинанс IэпыIэгъу рагъэгъэзэжьын, ежьхэм ямылъкукIэ цIыфхэм нэмыкI унэхэр къафагъотын фаеу хъущт. ПсэупIэхэм япащэхэм игъо афэсэлъэгъу шъолъыр программэм хагъэхьащт унэхэм яреестрэ зэхагъэуцо зыхъукIэ Iофыгъоу къэтэджыхэрэр зэу зэшIуахынхэу», — къыIуагъ КъумпIыл Мурат.
Адыгэ Республикэм псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ къызэриIуагъэмкIэ, 2017-рэ илъэсым къыщегъэжьагъэу 2021-рэ илъэсым нэс зэхэтэкъонкIэ щынагъоу алъытэгъэ унэ 67-р джыри шъолъыр реестрэм зэрэхэт.
АР-м и ЛIышъхьэ ипресс-къулыкъу