Донецкэ ыкIи Луганскэ народнэ республикэхэм ащыпсэурэ цIыф­хэм, тикъэралыгъо ящынэгъончъагъэ къэухъумэгъэным фытегъэпсыхьэгъэ хэушъхьафыкIыгъэ дзэ операциер мэзаем и 24-м рагъэжьагъ.

Мамыр щыIакIэр зэтегъэуцожьыгъэным, цIыфхэр рэхьатэу псэунхэм, украинскэ нацистхэм апэшIуекIогъэным афэшI Урысыем и УIэшыгъэ КIуачIэхэр, Донбасс иополченцэхэр лIыгъэ хэлъэу мэзекIох.

Урысые Федерацием и Президентэу Владимир Путиным унашъоу зыкIэтхэжьыгъэм диш­тэу Дагъыстан Республикэм икIэлэ пIугъэу, старшэ лейтенантэу Нурмагомед Гаджимагомедовым, гухэкI нахь мышIэми, идунай зихъожьыгъэм ыуж, тын лъапIэу «УФ-м и ЛIы­хъужъ» зыфиIорэр къыфагъэшъошагъ.

— Нурмагомед лIыгъэ хэ­лъэу къепхыгъэ дзэкIолIхэр зэрищагъэх, командир шъыпкъэу зэрэщытыр къыгъэшъып­къэжьызэ ицIыфхэр къыухъу­магъэх. УIэгъэ хьылъэ тещагъэу къэзыухъурэигъэ боевикхэм гранатэр ащ ахидзагъ, ежьыри хэкIодагъ. Ащ фэдэ лъэбэкъу зыкIишIыгъэр неонацистхэм язекIуакIэ зыфэдэр, къаубытырэ цIыфхэм жъалымыгъэ хэлъэу зэрадэзекIохэ­рэр, зэраукIыхэрэр ешIэти ары. Сэ сыурыс цIыф, ау кIэ­лэ ныбжьыкIэу Нурмагомед Гаджимагомедовым лIыхъужъныгъэу зэрихьагъэм фэдэ щысэхэр зыслъэгъукIэ сэ къэсIонэу сыфай: сэ сылак, сыдагъыстан, сычэчэн, сыингуш, сытатар, сыджурт, сымордвин, сыосетин… Урысыем щыпсэурэ цIыф лъэпкъ шъищым ехъум ацIэ къепIоныр къины, мы къэралыгъом сызэрэщыщым сырэгушхо, — къыIуагъ Владимир Путиным.

Нурмагомед Гаджимагомедовым ныбжьыкIэ дэдэу идунай зэрихъожьыгъэр цIыфхэм гухэ­кIышхо ащыхъугъ. Дагъыстан икIэлэ пIугъэ лIыхъужъныгъэу зэрихьагъэр тщыгъупшэщтэп, мамыр щыIакIэр зэтегъэуцожьыгъэным ищыIэныгъэ фитыгъ.

Нурмагомед унэгъо дахэ ышIагъ, ишъхьэгъусэ бэмышIэу сабый цIыкIу къыфэхъугъ, ау ар ыбгъэгу кIиубытэнэу игъо ифагъэп. Къэхъумэ, ятэ лIыхъужъныгъэу зэрихьагъэр къыгуры­Iощт, рыгушхощт. Тэри егъэшIэрэ шIэжьэу тыгу илъыщт.