АР-м инахьыжъхэм я Совет хэукъоныгъэшхоу елъытэ Хэгъэгу зэошхом итарихъ кIитхыкIыжьынэу ыкIи неонацизмэм кIигъэгушIунхэу Украинэр зэрэфежьагъэр.

ХэушъхьафыкIыгъэ дзэ операциер рагъэжьэным епхыгъэу Урысыем и Президентэу Владимир Путиным ышIыгъэ унашъом дыригъаштэу къэгущыIагъ Адыгеим инахьыжъхэм я Совет итхьаматэу ГъукIэлI Нурбый.

— Украинэм ежь итарихъи, Хэгъэгу зэошхом итарихъи кIитхыкIыжьынхэу зэрэфежьагъэмкIэ лажьэ иI. Саугъэтхэм зао аришIылIагъ ыкIи ар зыми тэрэзэу ылъытэрэп. Ащ нэмыкIэу, Минскэ зэзэгъыныгъэ­хэм ягъэцэкIэн лъигъэкIуатэзэ, зы лъэбэкъу талъэныкъо­кIэ Украинэм къыдзыгъэп, Евросоюзым ыкIи НАТО-м ахэхьанхэм фэшI зэпымыоу КъохьапIэм зыфищэигъ. Ти­къэ­ралыгъо ищынэгъончъагъэ ащ зэщигъэкъон ылъэкIыщт, — къыIуагъ ГъукIэлI Нурбый.

ТигущыIэгъу къызэрэхигъэщыгъэмкIэ, Урысыем, Бела­русым ыкIи Украинэм яцIыф лъэпкъхэр зыкIыныгъэ ахэлъэу, ныбджэгъуныгъэ азыфагу илъэу сыдигъуи тинахьыжъхэм алъытагъ.

— Тэ егъашIи тшIэныеп милитаризацием игъогу Украинэр техьанышъ, Урысыем къыпэуцужьынэу, — къыхигъэ­щыгъ Адыгеим нахьыжъхэм я Совет итхьаматэ.

Джащ фэдэу ГъукIэлI Нурбый тыгу къыгъэкIыжьыгъ Президентэу Владимир Путиным а унашъор ышIыным ыпэкIэ хабзэм илъэныкъо пстэуми ялIыкIохэр, политик пэрытхэр ыугъой­хи яшIошIхэм зызэращигъэгъозагъэр. Пстэуми зэдаш­тагъ ыкIи тикъэралыгъо джы зэрыкIогъэ гъогур къыхахыгъ.

— Минскэ зэзэгъыныгъэхэр зыщыIэхэм илъэси 8 тешIагъ. Ащ къыкIоцI Донецкэ ыкIи Луганскэ хэкухэм яIофыгъо зэшIохыгъэнымкIэ зы лъэ­бэкъу Украинэм ышIыгъэп. Унашъоу аштагъэр къины, гузэжъогъугъэ зыхэлъ ыкIи бэрэ амыдзырэ лъэбэкъу, ау нэмыкI хэкIыпIэ щыIагъэп, — еIо ГъукIэлI Нурбый.