Урысыем инароднэ артистэу Кукэнэ Мурат хэушъхьафыкIыгъэ дзэ операциеу Донецкэ ыкIи Луганскэ республикэхэм ащыкIорэм фэгъэхьыгъэу игупшысэхэм тащигъэгъозагъ:

— БлэкIыгъэ илъэсым сянэ-сятэхэм яунэ дэпкъ шIэжь пхъэмбгъоу къыщызэIуахыгъэм мырэущтэу тетхагъ: «Мы унэм щыпсэугъэх Советскэ-Финскэ заом хэлэжьагъэу, Хэгъэгу зэошхом иветеранэу, Сталинград заом хэлэжьагъэу Кукэнэ Рэщыд Хьаджэбый ыкъор, Хэгъэгу зэошхом иветеранэу, Кавказыр къэзыгъэгъунагъэхэм, Къы­рым, Украинэр, Польшэр, Чехословакиер шъхьафит зышIыжьыгъэ­хэм ахэтыгъэу Кукэнэ Зулихъ Индрыс ыпхъур».

— Республикэм ыкIи районым яветеран организациехэм ялIыкIохэр, Юнармиер, сиIофшIэгъу актерхэр, кIэлэеджакIохэр Iофтхьабзэм хэлажьэхи мэфэкI шIыкIэм тетэу шIэжь пхъэмбгъур къызэIуа­хыгъ. Сэ, советскэ дзэхэм, я 82-рэ гвардейскэ шхончэо полкым сыхэтэу Германием, Бернау къулыкъур щысхьыгъ. Интернационализмагъэ къызэ­рэсхэфагъэм ыкIи Германскэ Демократическэ Республикэр илъэс 25-рэ зэрэхъурэм тефэу лъэпкъхэм азыфагу илъ зэныбджэгъуныгъэр гъэпытэгъэным сиIахьышIу зэрэхэсшIыхьагъэм афэшI бгъэхалъхьэ къысфагъэшъошагъ. Тятэжъ пIашъэхэр, тятэжъхэр, тилъэпкъэгъу миллион пчъагъэхэр фашизмэм пэшIуекIохэзэ ящыIэныгъэ атыгъ. Ащ икIэрыкIэу къедгъэгъэзэжьы хъущтэп. Донбасс, Луганскэ ыкIи Урысыер къаухъумэзэ тидзэкIолIхэм лIыхъужъныгъэ ахэлъэу хэушъхьафыкIыгъэ дзэ операциер агъэцакIэ.