Социальнэ IофышIэм игугъу тшIы зыхъукIэ апэ тынаIэ зытетыдзэрэр гущыIэу «IэпыIэгъур» ары.

Анахь фэIо-фэшIэ къызэрыкIоу къытщыхъухэрэр зыныбжь хэкIотагъэхэмкIэ къин дэдэу къыхэкIы. Ащ фэдэ чIыпIэ итхэм IэпыIэгъу афэхъухэрэр гукIэ­гъуныгъэ зыхэлъ цIыфхэр ары.

Мыхэм афэдэу гукIэгъу ин зыхэлъ цIыфхэм яIофшэн зэри­фэшъуашэу зэхэпщэныр, нэжъ­Iужъхэм, сэкъатныгъэ зиIэхэм, IэпыIэгъу зищыкIагъэхэм игъом ябгъэгъотыныр Iофыгъо псынкIэу щытэп, ау Гъыщ Зулинэ ар зэрифэшъуашэу зэшIуехы.

2005-рэ илъэсым къыщегъэ­жьагъэу Зулинэ Шэуджэн районым исоциальнэ къулыкъу Iоф щешIэ. А уахътэм къыкIоцI зы­фэгъэзэгъэ Iофыр ыгу етыгъэу, чанэу зыгъэцэкIэрэ цIыфэу зыкъыгъэлъэгъуагъ. ГукIэгъуныгъэрэ шъхьэкIэфэныгъэрэ зэрэхэлъыр нафэ хъугъэ.

ЦIыфхэм социальнэ фэIо-фа­шIэхэр афэгъэцэкIэгъэнымкIэ комплекснэ Гупчэм ия 2–рэ къутамэу Шэуджэн районым щыIэм ипащэу джырэ уахътэ Зулинэ мэлажьэ. А къутамэм нэбгырэ 97-рэ епхыгъ, ахэм социальнэ фэIо-фашIэхэр афегъэцакIэх.

Коронавирусым шъолъырым зызыщиушъомбгъугъэ уахътэм Зулинэ волонтерхэм ахэтэу зыныбжь хэкIотагъэхэм Iэпы­Iэгъу афэхъущтыгъ. Урысые по­литическэ партиеу «Единэ Россием» ар хэт.

Нэжъ-Iужъхэми, иIофшIэгъу­хэми Гъыщ Зулинэ цIыфыгъэшхо зэрэхэлъыр къыхагъэщы.

Нэжъ-Iужъэу IэпыIэгъу зыфэ­хъухэрэм ащыщхэу Унэрэкъо Казбекрэ Валентинэрэ ащ рэзэныгъэ гущыIэхэр пагъохых. «УиIофшIэн зэрифэшъуашэу зэрэбгъэцакIэрэм фэшI тызэ­рэпфэразэр къыхэдгъэщы тшIоигъу. Нэжъ-ужъхэм IэпыIэгъу уафэхъуным, ящыкIагъэр ябгъэ­гъотыным фэшI уиамал къы­хьыщтыр зэкIэ ошIэ. Чанэу уипшъэрылъхэр зэрэбгъэца­кIэрэм ишIуагъэкIэ тигумэкIыгъохэр зэшIотхын, неущырэ мафэм тыфэкIон тэлъэкIы. УзэрэгумэкIырэм фэшI «Тхьауегъэпсэу» къыотэIо» — къатхы ахэм.

Гъыщ Зулинэ иIофшIэгъухэм къызэрэхагъэщырэмкIэ, бзылъфыгъэм гукIэгъушхо хэлъ, сыд фэдэ уахъти ишIуагъэ цIыфхэм аригъэкIыным фэ­хьазыр.

— Илъэс пчъагъэ хъугъэ ти­пащэ Iоф зыдатшIэрэр ыкIи а уахътэм къыкIоцI дэгъу нэмыкI етлъэгъулIагъэп. Сыдигъуи тиIэпыIэгъу, иIофшIэн ыгу етыгъэу егъэцакIэ. ЗэIофшIэгъухэм зэгурыIоныгъэ тазыфагу илъэу, зы унэгъо Iужъум фэдэу тызэхэт. Ар зиIэшIагъэр типащ ары тIоми хэукъоныгъэ хъущтэп, — къаIуагъ ахэм.

ЦIыфхэм социальнэ фэIо-фашIэхэр афэгъэцэкIэгъэнымкIэ комплекснэ Гупчэм ия 2–рэ къутамэ епхыгъэ нэжъ-Iужъхэмрэ иIофшIэгъухэмрэ