Адыгэкъалэ искусствэхэмкIэ икIэлэцIыкIу еджапIэ икIэлэегъаджэу Хьэкомэ Симэ бзылъфыгъэхэм я Дунэе мафэ ехъулIэу гущыIэгъу тыфэхъугъ.

КIэлэегъаджэу Iоф зысшIэрэр илъэс 33-рэ мэхъу, — къеIуатэ Адыгэ Республикэм культурэмкIэ изаслуженнэ IофышIэу Хьэкомэ Симэ. — Къыхэсхыгъэ сэнэхьатыр щыIэныгъэм бэшIагъэу къыщысэтэжьыгъэу сэлъытэ. Джырэ уахътэ пщынэо 18 есэгъаджэ. Лъэпкъ искусствэм фэщагъэхэу пIугъэнхэм сыпылъ.

ЕджапIэм ипащэу ЛIыхьэтыкъо Эммэ зэхэщэн IофыгъохэмкIэ IэпыIэгъу къы­фэхъу. С. Хьэкуамэм къызэрэтиIуагъэу, кIэлэеджакIохэр лъэпкъ искусствэм фэщагъэхэу гъэсэгъэнхэм фэшI зэнэ­къокъухэм нахьыбэрэ ахэлэжьэнхэ фае.

Фестивальхэм зафагъэхьазырынэу зырагъажьэкIэ орэдышъоу къырагъэIощтым кIэлэегъаджэр ягъусэу егупшысэх. Зэнэкъокъум имафэ къызыблагъэкIэ кIэлэеджакIохэр зэрэгумэкIыхэрэр Симэ зилъэгъукIэ мэгушIо. Гуетыныгъэ ин зэрахэлъыр ащ къыушыхьатэу кIэлэегъаджэм елъытэ. Москва, Шъачэ, Краснодар, Астрахань, Мыекъуапэ, нэмыкIхэм ащыкIогъэ фестивальхэм, зэнэкъокъухэм Адыгэкъалэ икIэлэеджакIохэр лауреат ащыхъухэу, хагъэунэфыкIырэ чIыпIэхэр къащыдахэу пчъагъэрэ къыхэкIыгъ.

Адыгэ Республикэм изэIухыгъэ фестиваль-зэнэкъокъоу Лъэцэрыкъо Кимэ фэгъэхьыгъэр яблэнэрэу джырэблагъэ Мыекъуапэ щызэхащагъ.

— Пщынэо цIэрыIоу, композиторэу Лъэцэрыкъо Кимэ тэгъэлъапIэ. Ащ итворчествэ ехьылIэгъэ зэнэкъокъоу щыIа­гъэхэм зэкIэми тахэлэжьагъ, —тизэдэгущыIэгъу лъегъэкIуатэ Хьэкомэ Симэ. — Тиеджа­кIохэм яшIэныгъэ хагъахъозэ, щытхъуцIэхэр къызэрэдахырэм сегъэгушIо.

ШIухьафтын къыфашIыгъ

Лъэпкъ пщынэм адыгэ орэдышъохэр къегъэIогъэнхэмкIэ ансамблэхэм язэнэкъокъу Адыгэкъалэ икIэлэеджа­кIохэм апэрэ чIыпIэр къыщыдахыгъ. «Уджыр», «ЛъэпэчIасэр», адыгэ мэкъа­мэхэр ансамблэм ыгъэжъынчыгъэх. ЯхъулIэ Расулрэ ХъуакIо Альбертрэ пщынэм къырагъэIуагъ. ЛIэхъусэжъ Дамир пхъэкIычау, КIыкI Дамир шъонтырпау.

Симэ тызэрэщигъэгъозагъэмкIэ, зэкIэ кIалэхэр пщынаох, ищыкIагъэ зыхъукIэ пхъэкIычао, шъонтырпао мэхъух. Жъыум зыфагъэсэныр Iофыгъо шъхьаIэхэм ахалъытэ.

Пщынаохэр зырызхэу хэушъхьафыкIыгъэу фестивалым щызэнэкъокъугъэх. Симэ ригъэджэхэрэ ХъуакIо Альбертрэ ЛIэхъусэжъ Дамиррэ лауреат хъугъэх, ящэнэрэ чIыпIэхэр къафагъэшъошагъэх.

Бзылъфыгъэхэм я Дунэе мафэ ехъу­лIэу пщынаохэр якIэлэегъаджэхэм афэгушIуагъэх, фестивалым гъэхъагъэу щашIыгъэр Хьэкомэ Симэ фагъэхьы.

Сэнэхьатыр шIогъэшIэгъон

Убзылъфыгъэу упщынэоныр, уисэнэхьат кIэлэеджакIохэр фэбгъэсэнхэр Iоф къызэрыкIоп. Лъэпкъ искусствэр игупшысэхэм ахэкIырэп. Хьэкомэ Симэ иунагъо дахэ. ШъэуитIурэ пшъашъэрэ иIэх. ЗэгурыIоныгъэу ахэлъыр щыIэныгъэм къыщятэжьы.

2022-рэ илъэсыр къэралыгъом щыпсэурэ лъэпкъхэм яискусствэрэ якультурнэ кIэнрэ я Илъэс. Симэ ар къыдилъытэзэ, мурад гъэнэфагъэхэр ышIыгъэх. Ригъэ­джэгъэ пщынаохэм сыд фэдэ сэнэхьат къыхахыгъэми, искусствэр агъэлъапIэ. Пчыхьэзэхахьэхэр, нысащэхэр, нэмыкI Iофтхьабзэхэр пщынаохэм къагъэбаих, лъэпкъ шIэжьыр гум къыщежьэу алъытэ. ЕджапIэм шIэныгъэу щызэрагъэгъотыгъэр ящыIэныгъэ щыщ хъугъэ. ЯкIэлэегъаджэ «тхьауегъэпсэу» раIожьызэ, мэфэкIым ехъулIэу фэгушIох.

ЕмтIылъ Нурбый.