Унэгъо ныбжьыкIэхэм адеIэх
Унэгъо ныбжьыкIэхэу сабыибэ зэрысхэм зыщыпсэущтхэ унэ ащэфыным пае сертификатхэр ятыгъэнхэм фэгъэхьыгъэ Iофтхьабзэ республикэм иправительствэ и Унэ тыгъуасэ щыкIуагъ.
«Унэгъо ныбжьыкIэхэм зычIэсыщтхэ унэхэр къызIэкIагъэхьанхэм пае хэушъхьафыкIыгъэ къэралыгъо программэр республикэм щыпхыращы. Мы илъэсым федеральнэ ыкIи республикэ бюджетхэм къахагъэкIыгъэр фэдитIукIэ нахьыбэ ашIын алъэкIыгъ. ПстэумкIи сомэ миллиони 164,6-м ар нэсыгъ. Унэгъо ныбжьыкIи 178-мэ сертификатхэр аратыгъэх, илъэсэу икIыгъэм елъытыгъэмэ, унэгъо 40-кIэ ар нахьыб», — къыIуагъ КъумпIыл Мурат.
Республикэм и ЛIышъхьэ къызэриIуагъэмкIэ, демографие пшъэрылъхэм язэшIохын дакIоу унэгъо ныбжьыкIэхэм IэпыIэгъу ятыгъэныр Урысыем и Президентэу Владимир Путиным пхырищырэ социальнэ политикэм илъэныкъо шъхьаIэу къэнэжьы.
«Унэгъо ныбжьыкIэхэм неущырэ мафэм яцыхьэ телъыным, кIэлэцIыкIухэр бэу къагъэхъунхэм ыкIи ахэр алъэ тырагъэуцонхэм яамал яIэным тэркIэ мэхьэнэ гъэнэфагъэ иIэу щыт. А пшъэрылъышхом изэшIохынкIэ къэралыгъом социальнэ программэ зэфэшъхьафхэр къызфигъэфедэхэзэ ныбжьыкIэхэр кIегъэгушIух», — къыкIигъэтхъыгъ КъумпIыл Мурат.
ЦIыфхэм ящыIакIэ нахьышIу шIыгъэным пае республикэм кIэлэцIыкIу IыгъыпIэхэр, еджапIэхэр, медицинэ учреждениехэр, культурэм иунэхэр, спорт псэуалъэхэр щашIых ыкIи щагъэцэкIэжьых, джащ фэдэу инженер, гъогу инфраструктурэм зырагъэушъомбгъу.
Сертификатхэр зэратыхэрэм гухэлъхэу яIэхэм зэIукIэгъум илъэхъан КъумпIыл Мурат защигъэгъозагъ, джащ фэдэу чIыпIэу зыщыпсэухэрэм социальнэ проект зэфэшъхьафхэр зэращагъэцакIэхэрэм еплъыкIэу фыряIэр зэригъэшIагъ.
ЦIыфхэм социальнэ IэпыIэгъоу аратырэр нахьышIоу зэхэщэгъэным иIофыгъохэм ренэу ынаIэ зэратыригъэтырэм пае унэгъо ныбжьыкIэхэм ялIыкIохэм къаIуагъ республикэм и ЛIышъхьэ инэу зэрэфэразэхэр. Джащ фэдэу ежьхэр зыщыпсэухэрэ чIыпIэхэм зэхъокIыныгъэхэу афэхъухэрэм яхьылIагъэу къыфаIотагъ. Республикэм и ЛIышъхьэ Iофыгъо гъэнэфагъэхэм япхыгъэ пшъэрылъхэр къулыкъухэм афишIыгъэх.
ЗэIукIэгъур ыкIэм зыщыфэкIощтым КъумпIыл Мурат сертификатхэмрэ шIухьафтын лъапIэхэмрэ аритыжьыгъэх къэралыгъо программэм хэлажьэхэрэм. Псауныгъэ пытэ яIэнэу, гухэлъ дахэу зыфашIыжьыгъэхэр къадэхъунхэу унэгъо ныбжьыкIэхэм ар афэлъэIуагъ.
Адыгэ Республикэм псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэу мы Iофтхьабзэм къекIолIагъэхэм ахэтыгъэ Валерий Картамышевыр шIоу щыIэр зэкIэ къадэхъунэу унэгъо ныбжьыкIэхэм афэлъэIуагъ.