Донецкэ ыкIи Луганскэ народнэ республикэхэм хэушъхьафыкIыгъэ дзэ операциер защыкIорэр тхьамафэм ехъугъ. Зэпэуцужьыр Урысыем къыригъэжьа­гъэп, цIыф къызэрыкIохэм ярэхьатныгъэ, ямамырныгъэ къэухъумэгъэным фэ­ба­нэ. Президентэу Владимир Путиным ыштэгъэ унашъом Урысыем щыпсэухэ­рэм дырагъаштэ.

Урысыем IофшIэнымкIэ и ЛIыхъужъэу, Адыгеим, Къэбэртэе-Бэлъкъарым, Къэрэщэе-Щэрджэсым янароднэ тхакIоу, общественнэ IофышIэу Мэщ­бэшIэ Исхьакъ хэушъхьафыкIыгъэ дзэ операциеу зэхащагъэм дырегъаштэ.

— Зэпэуцужьыр илъэси 8-кIэ узэкIэIэбэжьымэ къежьэгъагъ, джы Урысыем и Президент ар егъэу­цужьы нахь ригъажьэрэп. Бэрэ гущыIэгъу афэхъугъ, яжагъ, гъунэм Iофыр зы­нэсым операциер ригъэ­жьагъ. Ткъош украинцэхэм тэ тапэуцужьырэп, Хэгъэгу зэошхом илъэ-хъан Украинэм ичIыгу тикIэлэ ныбжьыкIабэ щы­фэхыгъ. Андырхъое Хъусен Украинэм ит селоу Дьяковым дэжь щыкIогъэ заом лIыгъэшхо щызэрихьагъ. Илъэс 21-рэ нахь ыныбжьыгъэп зыхэкIуа­дэм. Зэо лъэхъаныр дэгъоу къэсэшIэжьы, ащыгъум илъэс 11 сыныбжьыгъэр. Сыд фэдэ зэо-зэпэуцужьи дэи, тхьамыкIагъо къызыдехьы. Сшы­на­хьыжъхэр заом хэлэ­жьа­гъэх, къоджэ советым ипащэ лIыжъхэр игъусэхэу урамым къызытехьэкIэ бзылъфыгъэхэр щтэщтыгъэх, зисабый, зишъхьэгъусэ хэкIодагъэхэм адэжь макъэ арагъэIунэу Iухьэщтыгъэх. Оккупациери дэ­гъоу къэсэшIэжьы, — еIо народнэ тхакIом.

МэщбэшIэ Исхьакъ ­къы­зэриIуагъэмкIэ, Украи­нэм ичIыпIэ зэфэшъхьаф­хэм ащыIагъ. Донецкэ ыкIи Луганскэ анахьэу урысхэр щэпсэух. Ахэр яныдэлъфыбзэкIэ амы­гъэгущыIэнхэу, якультурэ чIарагъэнэнэу нацистхэр илъэси 8-м къыкIоцI пы­лъы­гъэх, жъалымыгъэ ады­зэрахьагъ. Сыд фэдэ цIыф лъэпкъи ныдэлъ­фыбзэ, культурэ иI. Ахэр къэухъумэгъэнхэм зэрэ­фэ­банэхэрэм, ащкIэ Урысыер IэпыIэгъу зэрафэ­хъурэм тхэкIо цIэрыIом дырегъаштэ.

— ХэушъхьафыкIыгъэ дзэ операцием ишIуагъэ­кIэ цIыфхэм мамыр щы­IакIэр алъэгъужьынэу тэгугъэ. Непэ ахэр чIыунэхэм ачIэсых, яунэхэр нацистхэм къагъао. Къэралыгъо зэфэшъхьафхэм санкциехэр Урысыем къытыралъхьэх. Сыд фэдэ лъэпкъи, хэгъэгуи хэу­къо­ныгъэ зымышIырэ щыIэп. США-м ежь фэдэ щымыIэу къышIошIы, зэкIэ зэлъиубытынэу фай. Ащ нахьыбэрэ уежэжьынэу щытыгъэп. Зэпэуцу­жьыр Урысыер арэп къезыгъэжьагъэр. Мамыр-ны­гъэм ыуасэ зыфэдэр дэгъоу сэшIэ, ащ икъы-дэ­хын псынкIэп. Хэгъэгу зэошхом илъэхъан урыс­хэмрэ украинцэхэмрэ зэ­гъусэхэу фашистхэм апэуцужьыгъэх, ар тарихъым хэхьагъ. Лъэшэу гукъаор ар зэращыгъупшагъэр ары, — еIо МэщбэшIэ Исхьакъ.

Хэгъэгу зэошхом хэкIодагъэхэм яшIэжь бгъэ­лъэпIэн зэрэфаер, Со­ветскэ Союзым и ЛIы­хъужъхэр зыщыбгъэгъу­пшэхэ зэрэмыхъущтыр тхэкIо цIэрыIом къыIуагъ. Лъэпкъ зэхэдз ямыIэу, зэготхэу ахэр пыим ебэныгъэх. Непэ нацистхэм апкъ къикIыкIэ Украинэм щыхъурэ тхьамыкIагъор къэгъэуцугъэн, Донецкэ ыкIи Луганскэ ащыпсэурэ цIыфхэр къэухъумэ­гъэнхэ фае. ДЕЛЭКЪО Анет.