Адыгеим и ЛIышъхьэу КъумпIыл Мурат Адыгэ Республикэм гъогухэр щынэгъончъэнхэмкIэ и Комиссие изэхэсыгъо зэрищагъ.

«Гъогу отраслэм зегъэушъомбгъугъэнымкIэ Адыгеим бэ ща­шIэрэр. Гъогухэм тхьамыкIагъо­хэр нахь макIэу атехъухьанхэм тегъэпсыхьагъэу ведомствэ зау­лэмэ, ГИБДД-м Iоф адэтэшIэ, мыщкIэ федеральнэ гупчэри IэпыIэгъу къытфэхъу. Iофыр зы­фэ­гъэхьыгъэр тиреспубликэ ис­хэм щыIэкIэ-псэукIэ дэгъурэ псауныгъэ пытэрэ яIэныр ары. Мы лъэныкъом лъэшэу тынаIэ тедгъэтын фае», — къыIуагъ ­Адыгэ Республикэм и ЛIы­шъхьэ.

2021-рэ илъэсым республикэм игъогухэм тхьамыкIагъоу атехъухьагъэхэм, гъогурыкIонымкIэ шапхъэхэр къыдалъытэнхэмкIэ амалэу зэрахьэхэрэм Адыгэ Республикэм и МВД и ГИБДД и ГъэIорышIапIэ ипащэ ипшъэ­рылъхэр пIалъэ горэкIэ зыгъэцакIэу Мамыекъо Казбек къатегущыIагъ.

ГъэрекIо тхьамыкIэгъо 428-рэ республикэм игъогухэм ащы­хъугъэу агъэунэфыгъ. Нэбгырэ 92-рэ ахэм ахэкIодагъ, нэбгырэ 494-мэ шъобжхэр атещагъэ хъу­гъагъэ. Доклад къэзышIыгъэм зэрэхигъэунэфыкIыгъэмкIэ, Адыгеим игъогухэм язытет хэп­шIыкIэу нахьышIу хъугъэ, урам­хэмрэ гъогухэмрэ остыгъэхэр апалъагъэх, гъогу Iахьхэм ащыщ­-хэр агъэкIэжьыгъэх е агъэцэ­кIэжьыгъэх.

Зэхэсыгъом зэрэщыхагъэунэфыкIыгъэмкIэ, ешъуагъэхэу рулым IутIысхьэхэрэм хэбзэукъоны­гъэхэр зэрашIырэм нахь пхъа­шэу гъунэ лъафын фае. БлэкIыгъэ илъэсым ешъуагъэхэу транспортыр агъэIорышIэу ятIонэрэу нэ­бгыри 177-рэ къагъэуцугъ.

Красногвардейскэ, Кощхьэблэ, Мыекъопэ районхэм япащэ­хэм гъогухэр щынэгъончъэнымкIэ ячIы­пIэхэм яIофхэм язытет фэ­гъэхьыгъэу къаIотагъ. Адыгэ Рес­публикэм и ЛIышъхьэрэ Адыгэ Республикэм иминистрэ­хэм я Кабинетрэ я Администрацие ипащэ игуадзэу Хъоткъо Саныет тхьамыкIагъохэр рес­публикэм къыщыхъунхэр къызыхэкIыхэрэм къатегущыIагъ.

Адыгеим и ЛIышъхьэу КъумпIыл Мурат районхэм япащэхэм пшъэрылъ афишIыгъ мы лъэныкъомкIэ хэбзэукъоныгъэ­хэр зы­шIыхэрэм Iофэу адашIэрэр агъэ­лъэшынэу, гъогухэр щынэгъончъэнымкIэ муниципальнэ комиссиехэм язэхэсыгъохэм ахэр къырагъэблэгъэнхэу.

ГъэрекIо шъолъыр автомобиль гъогухэм тхьамыкIэгъо 12 къатехъухьагъ. Ахэм нэбгыри 3 ахэ­кIодагъ, нэбгырэ 11-мэ шъобж­хэр атещагъэ хъугъэ. 2020-рэ илъэсым егъэпшагъэмэ, гъогухэм тхьамыкIагъоу атехъу­хьагъэр нахь макIэ хъугъэ.

Адыгеяавтодорым къызэритыгъэмкIэ, 2021-рэ илъэсым проектым ибюджет сомэ миллиарди 2-рэ миллион 77-рэ хъущтыгъэ. Ащ щыщэу сомэ миллиард 1,63-м ехъурэр федеральнэ бюджетым имылъкоу щытыгъ. 2021-рэ илъэсым лъэпкъ проектым диштэу километрэ 75,6-рэ зикIыхьэгъэ гъогу 59-мэ IофшIэнхэр ащагъэцэкIагъэх: гъогу 55-р агъэцэкIэжьыгъ, гъогуи 4-мэ щынэгъончъэнымкIэ шапхъэхэр ащагъэлъэшыгъэх.

Мыгъэ сомэ миллион 627-рэ зытефэщт IофшIэнхэр агъэцэ­кIэщтых, километрэ 58-м ехъу зи­кIыхьэгъэ гъогу 23-рэ агъэцэ­кIэжьыщт.

Шъолъыр проектэу «Гъогухэр щынэгъончъэнхэр» зыфиIорэм къыдыхэлъытэгъэ Iофтхьабзэхэм апае мылъку тедзэ къызэрэхагъэкIыщтыр зэхэсыгъом къыща­Iуагъ. Адыгеим и ЛIышъхьэу КъумпIыл Мурат Комиссием иунашъохэр зэрагъэцакIэрэм гъу­нэ лъафынэу пшъэрылъ афишIыгъ.

АР-м и ЛIышъхьэ ипресс-къулыкъу

Сурэтыр А. Гусевым тыри­хыгъ.