ИлъэсийкIэ узэкIэIэбэжьмэ Украинэм цIыфхэм зыкъыщаIэти, бырсырышхо къызетаджэм, ащ щыхъурэ-щышIэрэм яшIошI къыраIолIэнэу тиреспубликэ щызэлъашIэрэ цIыфхэм зафэдгъэзэгъагъ. Тарихъ шIэныгъэхэмкIэ докторэу Пэнэшъу Аскэр а лъэ­хъаным гущыIэгъу тызыфэхъум, «Украинэм хабзэ щыбгъэпсын плъэкIыщтэп» ыIогъагъ. Мы ма­фэхэм а гущыIэхэр бэрэ сыгу къэкIыжьыгъэх, зэрэтэрэзхэри нахь къызгурыIуагъ. Ащ къыхэ­кIэу Аскэр гущыIэгъу тыфэхъугъ, Украинэм щыкIорэ хэушъхьафыкIыгъэ дзэ операцием ишIошI­хэри къыриIолIагъэх.

Украинэм хэбзэгъэуцугъэм тетэу цIыфхэм щыхадзыгъэ Пре­зидентыр тырадзи, ышъхьэ зыхихьажьыгъэм ыуж илъэсий те­шIагъ. А уахътэм къыкIоцI нэ­бгырэ заулэ къэралыгъо пащэу щыхадзыгъ, ау хэгъэгум рэхьатныгъэ илъ хъуным ахэр фэлэ­жьагъэх пIон плъэкIыщтэп. «По­рошенкэр олигарх, Америкэм къегъэIорышIэ, ышъхьэ пае мэ­псэу» аIуи хадзыжьыгъэп. ХэдзакIохэм япроцент 70-рэ фэдизмэ амакъэ фати мыкапиталистэу, артист хадзыгъ. ЦIыф­хэр Зеленскэм лъэшэу щыгу­гъыгъэх хэгъэгум заор щигъэуцунэу. Ау ари бгъэIорышIэщтмэ къин пымылъэу къычIэкIыгъ.

— Аскэр, «Украинэм хабзэ щыбгъэуцун плъэкIыщтэп» зыкIэпIогъагъэм зыкъыфэд­гъэзэн.

— Сэ сишIошIыкIэ, Украинэр зыкIэмыхъурэр — лъэпкъыр зэ­зыщэлIэн зэрэщымыIэр ары, — еIо сигущыIэгъу. — Украинэм лъэпкъыбэ ис, ау нахьыбэ хъурэ лъэпкъхэр япчъагъэкIэ лъэшэу зэтекIхэрэпышъ, зэкIэми ялIыкIо президентынэу фаех. Ащ фэдэу къохьапIэмкIэ джуртхэр, гузэгум украинцэхэр щыIэх, къокIыпIэм урысыр щынахьыб. Нэ­мыкI лъэпкъ­хэри хэгъэгум исых. Зэ­кIэми яцIыф къэралыгъом ипэщэнэу фаех. Ау сыдрэ хэгъэгуи цIыфхэр зэхэзыщэнхэ зылъэ­кIыщт лъэпкъышхо иIэн фае, гу­щыIэ щыI «мононация» ыIоу, ары къэралыгъом лъапсэ фэхъурэр.

Я 90-рэ илъэсхэм Москва бэрэ сыкIощтыгъ. МэшIокур Харь­ков къызыщыуцукIэ, кIа­лэхэр бэу къитIысхьэщтыгъэх. Ахэм сахэдаIоу хъугъэшъ, зэкIэми ялIыкIо къэралыгъом ипэщэн фаеу алъытэщтыгъ, ащ шъхьаи­хыгъэу тегущыIэщтыгъэх, ау мы IэнатIэр зыIыгъыщтыр къэралыгъом щыпсэухэрэм янахьыбэм къыхэкIын зэрэфаер гъэнэфагъэ.

Тихэгъэгушхо зызэхэзым Ук­раинэр «шъхьафитэу» псэугъэ, ау къэралыгъо гъэпсыныр сыдигъуи ащ щыкъиныгъ, пэщэ пчъагъэ щызэблахъугъ, ау къызэIэзгъэхьанэу, цIыфхэр къэ­зыгъэбырсырынэу исыр бэшъ, бгъэIорышIэнхэр къин. Къэралыгъом щыпсэурэ лъэпкъхэр зэкIэри зэхэзыщэнхэ лъэпкъ идеер къызыпкъырыкIын щыIэн фае. Ау джырэ пащэхэр тезыгъахьэхэрэр IэкIыбым щы­Iэх. Ахэм аIорэр Порошенкэми ышIагъ, Зеленскэми ешIэ. Аужым, Байдэни корпорацие инхэм ялIыкIохэм агъэIорышIэ.

Украинэм непэ щыхъурэм, щышIэрэм уиунэ уисэу тегущы­Iэгъуай. ТымышIэу бэ Iофым хэ­лъын ылъэкIыщтыр. ЕтIанэ непэ къэбарIуатэу щыIэ хъугъэр бэдэд. Сэ сишIошIкIэ, умышIэрэм утемыгущыIэмэ нахьышIу. Сыд пае цIыфхэр бгъэпцIэнхэ фая?

Сэ сызыфаер тызэгурыIонышъ, зэпэуцужьыныр нахь псынкIэу тыухыныр ары. Ау ащ пае узыдэгущыIэрэм узэхихын, къыодэIун фае.

— Тхьауегъэпсэу.

Сихъу Гощнагъу.