Донецкэ ыкIи Луганскэ народнэ республикэхэм зышъхьэ къарызы­хыжьхэу Урысыем къакIохэрэм зыныбжь хэкIотагъэхэм ямызакъоу са­быйхэр зигъусэ унагъохэр ахэтых. Шъолъыр зэфэшъхьафхэм непэ ахэр арысых, амалэу щыIэмкIэ IэпыIэгъу арагъэгъоты.

АР-м гъэсэныгъэмрэ шIэ­ныгъэмрэкIэ и Министерствэ къызэрэщытаIуагъэмкIэ, гъэт­хапэм и 2-м ехъулIэу Донбасс ыкIи Луганскэ къарыкIыгъэхэ кIэлэцIыкIу нэбгырэ 45-рэ рес­публикэм ит гурыт еджапIэхэм ащеджэх. Ахэр яIахьылхэм е янэIуасэхэм адэжь ащэпсэух. Мы мафэм ехъулIэу Мыекъуа- пэ дэт гурыт еджапIэхэу N 7-м, N 20-м ыкIи лицееу N 8-м кIэ­лэеджэкIо зырыз къякIуалIэ.

Ащ нэмыкIэу республикэм ирайон зэфэшъхьафхэм, анахьыбэр Тэхъутэмыкъое районым, еджэныр щарагъэжьагъ. КIэлэцIыкIу IыгъыпIэу N 56-м зы нэбгырэ ратыгъ.

Тэхъутэмыкъое районым гъэ­сэныгъэмкIэ и ГъэIорышIапIэ ипащэ игуадзэу Мамхъо Эдуард къызэриIуагъэмкIэ, гъэтхапэм и 2-м ехъулIэу районым ит еджапIэхэу NN 3-м, 25-м, 27-м ДНР-м ыкIи ЛНР-м зышъхьэ къарызыхыжьыгъэхэ унагъохэм арыс кIэлэцIыкIуи 8 аще­джэх. Мы пчъагъэр джыри зэхъокIын ылъэкIыщт. Ащ дакIоу зисабый шIэныгъэ езыгъэгъоты зышIоигъоу къяуалIэхэрэм IэпыIэгъу афэхъух, зыщыпсэухэ­рэм елъытыгъэу нахь апэблэгъэ еджапIэм агъакIох.

— 2014-рэ илъэсым Украинэм бырсыр къызыщэхъум егъэзыгъэкIэ зихэгъэгу къэ­зыбгынагъэхэр тиеджапIэхэм ачIэдгъэхьэгъагъэх. ЧIыпIэ къи­ны ифэгъэ цIыфхэм IэпыIэгъу тафэхъуным тыфэхьазыр. Гуманитар IэпыIэгъур зыщау­гъоирэ пункт заулэ районым ит. Зиунэ къэзыбгынэгъэ кIэлэцIыкIухэм гуцаф амышIэу, къэралыгъо рэхьатым къызэ­рифагъэхэр, IэпыIэгъу зэрафэ­хъущтхэр къагурыдгъэIоныр типшъэрылъ. КIэлэеджакIохэр анахьэу пэублэ классхэм арысых, я 7-рэ классым щеджэнэу зы нэбгырэ къытэолIагъ. Джырэ уахътэм кIорэ хэушъхьэфыкIыгъэ дзэ операциер шIэхэу аухынышъ, бэ темышIэу яхэ­гъэгу агъэзэжьыным щыгугъырэр нахьыб. Ясабыйхэр кIэлэцIыкIу IыгъыпIэхэм аратынэу зи къытэолIагъэп, — еIо Эдуард.

Поселкэу Яблоновскэм дэт гурыт еджапIэм ипащэу Шъы­нэхъо Светланэ къызэриIуагъэм­кIэ, непэрэ мафэм ехъулIэу яеджапIэ нэбгыритIу къэкIо, ахэр я 3-рэ ыкIи я 5-рэ классхэм арысых. Я 7-рэ классым ис кIэлэеджакIом тхьапэ зэримыIыгъым къыхэкIыкIэ уры­сыбзэмкIэ ыкIи хьисапымкIэ аттестацие рагъэкIугъ, ащ ыуж еджэныр ригъэжьагъ.

— ЧIыпIэ къин ифэгъэ цIыф­хэм IэпыIэгъу уафэхъун фае. ЕджапIэм къэкIорэ кIэлэцIыкIу­хэм янэ-ятэхэм къызэраIуа­гъэмкIэ, хэушъхьаIэфыкIыгъэ дзэ операциер къемыжьэзэ ахэр яхэгъэгу къикIыгъэх. Арэу щытми, яIахьылхэм, ягупсэхэм агу афэузы, мамыр щыIакIэм кIэ­нэцIых. Илъэси 8-кIэ кIогъэ зэпэуцужьыр аухынышъ, яхэ­гъэгу агъэзэжьынэу мэгугъэх, — еIо Светланэ.

Гурыт еджапIэм ипащэ ­къы­зэриIуагъэмкIэ, гъэсэныгъэ ара­гъэгъоты, дунаим къыщы­хъурэр къафаIуатэ, чIыпIэ къин ифэрэм IэпыIэгъу узэрэфэхъун фаер агурагъаIо. Арын фае кIэлэцIыкIоу еджапIэм къы­чIэ­хьагъэхэм нэгушIоу зыкIапэ­гъокIыгъэхэри. Амалэу щыIэмкIэ ахэм IэпыIэгъу афэхъух, ыпкIэ хэмылъэу тхылъхэр аратыгъэх. 2014-рэ илъэсым егъэзыгъэкIэ зихэгъэгу къэзыбгы­нэгъэ унагъохэм арыс нэбгырэ 52-рэ мы еджапIэм щырагъэ­джагъэх. Джыри нахьыбэ къе­кIуалIэми , ащ фэхьазырых.

ДЕЛЭКЪО Анет.