ЗэдеIэжьныгъэм тегъэпсыхьэгъэ Урысые Iофтхьабзэу «Тызэгъус» зы­фиIорэм диштэу Донецкэ ыкIи Луганскэ народнэ республикэхэм зы­шъхьэ къарызыхыжьхэрэм апае шIушIэ IэпыIэгъур Адыгэ Респуб­ли­кэм щылъагъэкIуатэ.

Мыекъуапэ дэсхэм зэкIэми апэу IэпыIэгъур къаугъоеу рагъэжьагъ. Гъомылапхъэу пIэлъэ кIыхьэм къыкIоцI щылъын зылъэкIыщтхэр, антисептикхэр, зэрыгыкIэхэрэр, салфеткэ шынэхэр къырахьылIэх, ащ нэмыкIэу кIэлэцIыкIухэм апае джэгуалъэхэр, зэрагъэпскIыщтхэр, канцеляр пкъыгъо зэфэшъхьафхэр цIыфхэм къахьых.

Бзылъфыгъэу мультиваркэмрэ крупэ зэфэшъхьафхэмрэ къезыхьылIагъэм ынэпсхэр къышIокIуагъэх. ДНР-мрэ ЛНР-мрэ арысхэм, чIыпIэ зэжъу ифагъэхэу зышъхьэ къезы­хьы­жьэжьыгъэхэм ыгу лъэшэу афэ­гъоу мырэущтэу къыIуагъ: «Тэ тицIыфхэм анахь шэн дэгъоу ахэлъхэм ащыщ чIыпIэ хьылъэм тызэкъоуцон зэрэтлъэкIырэр». Амалэу щыIэм елъытыгъэу зыр адрэм деIэжьыным ынаIэ тырегъэты. ЦIыфхэм агу пыкIырэ пкъыгъохэр къахьых, амышIэрэ цIыфхэм ахэр афащэих, агу амыгъэкIодынэу араIо», — къы­хигъэщыгъ Народнэ фронтым ишъолъыр къутамэу Адыгэ Рес­публикэм щыIэм ипащэу Юрий Гороховым.

Народнэ фронтым ишъолъыр штаб хэтэу Андрей Крысановым игупыкI кIэлэцIыкIухэм алъыIэсыгъ: Донбасс къикIы­гъэхэм тхылъхэр, къэлэмхэр, джэгуалъэхэр, бгъэлэн плъэ­кIыщт тхылъ цIыкIухэр ыкIи нэмыкIыбэ къаритыгъ. Крысановым къызэрэхигъэщыгъэмкIэ, непэ чIыпIэ зэжъу ифагъэхэм тафэгумэкIыным, тынаIэ атедгъэтыным мэхьанэшхо иI.

ШIушIэ Iофтхьабзэм джащ фэдэу хэлэжьагъэх культурэм иIофышIэхэр, искусствэхэмкIэ колледжэу У. Хь. Тхьабысымэм ыцIэкIэ щытым икIэлэегъа­джэ­хэмрэ истудентхэмрэ. Предпринимательхэми афэлъэкIыщтыр ашIэ. ООО-у «Комплекс-Агро» зыфиIорэм пхъэшъхьэ-мы­шъ­хьэхэм къакIафыгъэ псыр зэрыт бэшэрэб мини 7-м ехъу а чIыпIэм къырищэлIагъ, компаниеу ХБМ-м пIэлъэ гъэнэфагъэкIэ цIыфхэр къызэращэлIэгъэхэ чIыпIэм хьылъэ къынигъэсыгъ.

Народнэ фронтым илIыкIохэм къаугъоигъэр зэкIэ Ростов хэкум ащэ. ШIушIэ Iэпы­Iэ­гъумкIэ пунктым иIофшIэн лъэ­кIуатэ.

Сурэтыр Мыекъопэ къэлэ администрацием исайт къит­хыгъ.