Мафэрэ щаIыгъыщтых
Зыныбжь хэкIотагъэхэу зиакъылкIэ щыкIагъэ зыфэхъугъэхэр мафэрэ зыщаIыгъыщтхэ отделениехэр Адыгеим къыщызэIуахых.
Мы илъэсым ащ фэдэ отделении 5 агъэпсынэу рахъухьэ. Апэрэр Красногвардейскэ районым къыщызэIуахыщт.
Зыныбжь хэкIотагъэхэм япсихическэ ыкIи физическэ зытет къызэтегъэнэгъэным, гъэпытэгъэным тегъэпсыхьэгъэ социальнэ фэIо-фашIэхэр мы чIыпIэхэм ащафагъэцэкIэщтых.
АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч Красногвардейскэ районым щагъэпсырэ отделением бэмышIэу щыIагъ ыкIи IофшIэнхэр зэрэрекIокIыхэрэм зыщигъэгъозагъ. Отделениер зычIэт унэхэм мебельхэр ыкIи нэжъ-Iужъхэм Iоф зэрадашIэщт оборудованиехэр ачIагъэуцуагъэх, щагур зэтырагъэпсыхьэ.
Псэуалъэр агъэфедэным фэхьазыр хъуным пае ищыкIэгъэ унашъохэр министрэм Красногвардейского КЦСОН-м ипащэу Къулэ Мэджыдэ фишIыгъэх.
Зыныбжь хэкIотагъэхэр мафэрэ зыщаIыгъыщт апэрэ отделениер мы илъэсым иятIонэрэ квартал къызэIуахынэу агъэнафэ.
Iэшъынэ Сусан.