НыбжьыкIэхэм ямедали 7
Урысыем иныбжьыкIэхэм атлетикэ онтэгъумкIэ язэнэкъокъу къалэу Старый Оскол щыкIуагъ.
Илъэс 13 — 17 ыкIи илъэс 13 — 15 зыныбжь кIалэхэр, пшъашъэхэр апэрэ чIыпIэхэм афэбэнагъэх.
Адыгэ Республикэм атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм зыщызыгъасэхэрэм тагъэгушIуагъ.
ЩашIэ Рустам, кг 67-рэ, шIыкIэу рывокым апэрэ чIыпIэр, толчокым ятIонэрэр, тIоштэгъум ятIонэрэ чIыпIэр къащихьыгъ, Урысыем спортымкIэ имастер хъугъэ.
Давид Саядян, кг 73-рэ, рывокым дышъэр къыщихьыгъ, тIоштэгъу зэнэкъокъум тыжьыныр къыщыдихыгъ.
Антон Шумаковым, кг 61-рэ, рывокым ящэнэнэрэ чIыпIэр къыщихьыгъ. ПчыхьакIэ Амир, кг 67-рэ, толчокым ящэнэрэ чIыпIэр къыщыфагъэшъошагъ.
ХагъэунэфыкIырэ чIыпIэхэр къыдэзыхыгъэхэм япащэх тренерхэу Чэмбэхъу Анзор, Сихъу Аслъан, Владимир Драневыр, Сихъу Рэмэзан.
— Тиспортсменхэм, тренерхэм зэнэкъокъум гъэхъагъэу щашIыгъэр къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэтэгъэхьы, — къытиIуагъ АР-м атлетикэ онтэгъумкIэ испорт еджапIэу Чыржьын Мухьарбый ыцIэ зыхьырэм ипащэу, спортымкIэ дунэе класс зиIэ мастерэу Сихъу Рэмэзан.
Тигъэзетеджэхэм ацIэкIэ тибатыр ныбжьыкIэхэм тафэгушIо, ямедальхэм ахагъэхъонэу афэтэIо. Шъопсэу, батырхэр!