Къалэу Мыекъуапэ щызэтырагъэпсыхьажьырэ псэуалъэхэм яуплъэкIун къыхиубытэу Адыгэ Республикэм и ЛIышъхьэу КъумпIыл Мурат псыхъоу Шъхьэгуащэ инэпкъхэм ягъэпы­тэн­кIэ ыкIи къэлэ паркым дэжь гъэпсэфыпIэ шъолъырэу иIэр зэтегъэпсыхьэгъэнымкIэ IофшIэнхэр зэрэкIохэрэм зы­щигъэгъозагъ.

Адыгэ Республикэм со­циальнэ-экономикэ хэхъо­ныгъэмкIэ ихэушъхьафыкIыгъэ программэ тегъэ­псыхьагъэу илъэсэу икIыгъэм къыщегъэжьагъэу а проектыр агъэцакIэ. Адыге­им къэралыгъо гъэ­псыкIэ иIэ зыхъугъэм ия 100-рэ илъэс мыгъэ ха­гъэунэфыкIыщт, ащ ехъу­лIэу IофшIэнхэр аухынхэу рахъухьэ.

Адыгэ Республикэм икъэралыгъо бюджет учреждениеу «Стройзаказчикым» ипащэ ипшъэ­рылъхэр зыгъэцэкIэрэ Хьа­джымэ Аслъан къы­зэриIуагъэмкIэ, графикым тетэу IофшIэнхэр макIох. Шъхьэгуащэ инэпкъхэм ягъэпытэн епхыгъэ Iофхэр етIупщыгъэу лъэкIуа­тэх. ЗэкIэмкIи километри 2,56-рэ фэдиз нэпкъэу агъэпытэщтым ыубытыщт, илъэгагъэ метри 2,5-м къыщыублагъэу метри 8-м нэсыщт. Лъэмыдж пышIагъэм къыщегъэ­жьагъэу шлюзхэм анэсэу пли­тэхэр агъэтIылъыщтых. Бжыхьэм ехъулIэу а Iоф­шIэнхэр аухыщтых.

Шъугу къэтэгъэкIыжьы: зэшIохыкIэ амал гъэшIэгъонхэр къызыфагъэфе­дэхэзэ, къэлэ паркым ылъэныкъокIэ щыIэ шъо­лъырыр проектым диштэу зэтырагъэпсыхьэ. ЦIыфхэр зыщытезекIухьащтхэ гъогухэр, кушъхьэфачъэ­хэм апае ыкIи аттракционхэр зыщызэхащэщтхэ чIыпIэхэр а лъэныкъом щагъэпсыщтых. Ащ нэмыкIэу тIысыпIэ цIыкIухэри агъэуцущтых. Псыхъом екIолIэнхэм пае ехыпIэ­хэри ашIыщтых.

Адыгеим и ЛIышъхьэ къалэу Мыекъуапэ имэрэу Геннадий Митрофановым пшъэрылъ фишIыгъ чIыпIэу зэтырагъэпсы­хьа­жьырэм щагъэтIысхьащт чъыг-къэгъагъэхэм ыпэрапшIэу ягупшысэнхэу, гъэтхэ лъэхъаныр бламыгъэкIынэу. Ащ нэмыкIэу пшъэрылъ фишIыгъ паркымрэ Пушкиным ыцIэкIэ щыт лъэпкъ унэм къыпэ­Iулъ чIыпIэмрэ ягъэкIэ­рэ­кIэн тегъэпсыхьэгъэ Iоф­тхьабзэхэр тэрэзэу къыдалъытэнхэу.

«ГъэпсэфыпIэ шъолъырым игъэпсын екIолIэкIэ тэрэз къыфэгъотыгъэн, чъыгхэр амал иIэмэ на­хьыбэу къызэрэзэтенэщтхэм ыкIи кIэхэр гъэтIыс­хьэгъэнхэм тынаIэ атедгъэтын фае. Пэрыт технологиехэр дгъэфедэхэзэ, специалистхэр, АКъУ­мрэ МКъТУ-мрэ ясту­дентхэр къыхэдгъэла­жьэ­хэзэ уахътэм диштэрэ шIыкIэ амалхэр къыдэ­лъытэгъэнхэм тыфэжъу­гъэсакъ. Непэрэ щыIакIэм диштэу, цIыфхэмкIэ Iэ­рыфэгъоу ыкIи цыхьэ­шIэгъоу гъэпсэфыпIэ шъо­лъырыр зэрэпсаоу щытын фае», — къыIуагъ КъумпIыл Мурат.

АР-м и ЛIышъхьэ ипресс-къулыкъу

Сурэтхэр А. Гусевым тырихыгъэх.