Адыгеим и ЛIышъхьэу КъумпIыл Мурат Мыекъопэ районым зэкIом псэупIэу ХъымыщкIэй дэт гурыт еджапIэм щыIагъ, гъэсэныгъэ зыщызэ­рагъэгъотырэ унэу агъэцэкIэжьырэм IофшIэнхэр зэрэщыкIохэрэм зы­щигъэгъозагъ.

Илъэсэу икIыгъэм ыкIэхэм адэжь Адыгэ Республикэм и ЛIышъхьэ пшъэрылъ зэрафи­шIыгъэм тетэу IофшIэнхэр рагъэжьагъэх. Унашъхьэр, джэхашъохэр, шъхьаныгъупчъэхэр, пчъэхэр, инженер коммуни­кациехэр зэблахъугъэх, спортзалыр агъэцэкIэжьыгъ, Интернет-зэпхыныгъэр щыIэ хъугъэ. Непэ кIэлэцIыкIу 70-рэ фэдиз еджапIэм чIэс.

Адыгеим и ЛIышъхьэ еджапIэм иIофхэм язытет зыщигъэгъозагъ ыкIи Адыгэ Республикэм и Премьер-министрэ иIэнатIэ зыгъэцэкIэрэ КIэрэщэ Анзаур пшъэрылъ заулэ фишIыгъ. Ахэр зэпхыгъэхэр еджапIэр къызэ­рэшIыхьагъэр зэблэхъугъэныр, пщэрыхьапIэр гъэцэкIэжьыгъэныр, кIэлэцIыкIухэр еджапIэм къызэрэнагъэсыщтхэр гъэнэ­фэгъэныр, мебелымрэ ящыкIэгъэ Iэмэ-псымэхэмрэ аIэкIэгъэ­хьэгъэнхэр.

ЧIыпIэу еджапIэм къыпэIу­лъыр нахь зэтегъэпсыхьэгъэным пае хэушъхьафыкIыгъэу пшъэрылъхэр ЛIышъхьэм афи­шIыгъэх. ПсэупIэм щызэшIуа­хырэ Iофыгъохэм еджапIэм Iутхэр ыкIи щеджэхэрэр къахэгъэлэжьэгъэнхэм, шэмбэт шIы­хьафхэр зэхэщэгъэнхэм, ячIыгу гупсэ итарихъ кIэлэеджакIохэр икъоу нэIуасэ фэшIыгъэнхэм КъумпIыл Мурат къыфэджагъ. ГущыIэм пае, нэмыц-фашист техакIохэм апэуцужьхи, Адыгеир шъхьафит зышIыжьыгъэхэм якъэхалъэ еджапIэм дэжь щыт. Джы саугъэтэу а чIыпIэм щагъэуцугъэм Хэгъэгу зэошхом хэкIодэгъэ нэбгырэ 200 фэдизмэ ацIэхэр тетых. АР-м и ЛIышъхьэ мемориальнэ комплексым гъэцэкIэжьын Iоф­шIэ­нэу щызэшIуахыхэрэм осэшIу къафишIыгъ ыкIи Хэгъэгу зэошхом илIыхъужъхэм яшIэжь къэухъумэгъэным мэхьанэшхо зэриIэр къыхигъэщыгъ.

ЕджапIэм иIофышIэхэм ыкIи ны-тыхэм якомитет илIыкIохэм КъумпIыл Мурат зэрэфэразэхэр къыраIуагъ ыкIи гъэ­сэныгъэ зыщарагъэгъотырэ орга­низациер зэбгырамыгъэкIы­жьыным къыкIэлъэIугъэх.

Ащ фэдэ къэбархэр зэрэмы­шъыпкъэхэр Адыгеим и ЛIы­шъхьэ къариIуагъ ыкIи еджапIэм къыпэIулъ чIыгу Iахьыр зыми зэрэрамытыщтыр къы­хигъэщыгъ.

«Адыгеим икъушъхьэлъэ чIыпIэ гугъапIэхэр къэзытырэ чIы­пIэу щыт. Мыекъопэ районым туризмэм зызэрэщиушъомбгъу­рэм дакIоу цIыфэу ащ щыпсэу­хэрэми япчъагъэ хэхъо, ащ къи­кIырэр еджапIэхэри нахь ящыкIагъэ зэрэхъухэрэр ары. Арышъ, программэ зэфэшъхьаф­хэм къызэрэдалъытэрэм тетэу къуаджэхэм ясоциальнэ ин­фраструктурэ нахь зэтедгъэпсы­хьан, а чIыпIэхэм ащыпсэухэрэм ящыIакIэ нахьышIу тшIын фае. Гъэсэныгъэ зыщызэра­гъэгъотырэ организациехэм ягъэ­­цэкIэжьын фэгъэхьыгъэ уна­шъохэу Урысые Федерацием и Президент къышIыгъэхэм хэушъхьафыкIыгъэу тынаIэ ате­дгъэтын фае», — къыIуагъ КъумпIыл Мурат.

Шъугу къэтэгъэкIыжьы: Урысыем и Президентэу Владимир Путиным партиеу «Единэ Россием» изэфэс пшъэрылъ къащыфишIыгъагъ еджапIэхэм ягъэцэкIэжьынкIэ программэ игъэкIотыгъэр хэгъэгум ща­гъэцэкIэнэу рагъэжьэнэу. Адыге­им 2022 — 2023-рэ илъэсхэм ателъытагъэу федеральнэ IэпыIэгъоу сомэ миллион 706-рэ къыфыхагъэкIыгъ, ащ ишIуагъэ къэкIощт республикэм иеджэпIи 10-мэ ягъэцэкIэжьынкIэ. Нэбгырэ мини 6,3-м ехъу а еджапIэхэм ачIэсых.

АР-м и ЛIышъхьэ ипресс-къулыкъу Сурэтхэр А. Гусевым тырихыгъэх.