Тегъэхъошхо афашIыщтэп
Украинэм щыхъухэрэм ыкIи УФ-м и Гупчэ Банк «ключевой ставк» зыфаIорэр къызэриIэтыгъэм афэшI Урысыем социальнэ мэхьанэ зиIэ товархэм ауасэ процент 23 — 30 фэдиз къахэхъонэу къэбарлъыгъэIэс амалхэм къарыхьагъ.
Монополием пэшIуекIорэ Федеральнэ къулыкъум къызэритыгъэмкIэ, сатыу гупчэхэу «Ашан», «Магнит» ыкIи «О’Кей» зыфиIохэрэм социальнэ мэхьанэ зиIэ гъомылапхъэу агъэнэфагъэхэм тегъэхъошхо афашIыщтэп, ар проценти 5-м шIокIыщтэп. Гъомылэпхъэ бэдзэрыр зыпкъ игъэуцогъэн фаеу Урысыем и Правительствэ игъоу зелъэгъум, сатыу гупчэу зигугъу къэтшIыгъэхэм мы унашъор зэдаштагъ.
ЩэпIэ гупчэхэм япащэхэм ашIыгъэ унашъом ишIуагъэкIэ Iэрыфэгъу уасэхэмкIэ гъомылапхъэхэр цIыфхэм къызIэкIагъэхьанхэ алъэкIыщт.
УФ-м и Правительствэ монополием пэшIуекIорэ Федеральнэ къулыкъум пшъэрылъэу фишIыгъэм хахьэу Урысыем промышленностымкIэ ыкIи сатыушIынымкIэ, джащ фэдэу мэкъу-мэщымкIэ иминистерствэхэм социальнэ мэхьанэ зиIэ гъомылапхъэу тегъахъо зыфэпшIы мыхъущтхэр къагъэнэфагъэх.
Мыщ фэдэ шIыкIэм къызэрэдилъытэрэмкIэ, социальнэ мэхьанэ зиIэ товархэм — щэхэкIхэм, хьаджыгъэм хэшIыкIыгъэ гъомылапхъэхэм, шъоущыгъум ыкIи «борщ наборым» къыхиубытэрэ хэтэрыкIхэм тегъахъоу афашIыщтыр зыфэдизыр ежь сатыу гупчэхэм агъэнафэ. Мыщ дэжьым къыхэгъэщыгъэн фае, тегъахъо фамышIынэу агъэнэфагъэр тикъэралыгъо къыщыдагъэкIырэ гъомылапхъэхэу цIыфхэр нахь къызыкIэупчIэхэрэр ары. Auchan Retail (гипермаркетхэу «Ашан» ыкIи «Атак»), Iахь-зэхэлъ обществэу «Тандер» («Магнит») ыкIи пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «О’Кей» зыфиIохэрэм апэ монополием пэшIуекIорэ къулыкъур щагъэгъозагъ социальнэ мэхьанэ зиIэ гъомылапхъэу къагъэнэфагъэхэм тегъахъоу афашIыщтыр проценти 5-м зэрэшIомыкIыщтыр.
ЩэфакIохэр щагъэгъозэнхэм пае «социальнэ мэхьанэ зиIэ гъомылапхъ» зытетхэгъэ хэушъхьафы-кIыгъэ тхьапэ цIыкIумкIэ уасэхэр къыхагъэщыщтых.
ООО-у «О’Кей» ыкIи АО-у «Тандер» зыфиIохэрэм 2022-рэ илъэсым гъэтхапэм и 1-м къыщегъэжьагъэу, «Auchan Retail-м» 2022-рэ илъэсым гъэтхапэм и 3-м къыщыублагъэу гъунапкъэхэр ыгъэнэфагъэх.
Монополием пэшIуекIогъэнымкIэ Федеральнэ къулыкъум зэрилъытэрэмкIэ, социальнэ мэхьанэ зиIэ гъомылапхъэхэм тегъахъо афэшIыгъэнымкIэ узышIокIы мыхъущт гъунапкъэхэр зэрагъэнэфагъэм ишIуагъэкIэ цIыфхэм зыпари пэрыохъу къафэмыхъоу анахь ящыкIэгъэщт продукциер зэрагъэгъотын алъэкIыщт.