Украинэм щыкIорэ хэушъхьафыкIыгъэ дзэ операцием, ащ фэгъэхьыгъэ къэбар зэфэ­шъхьафэу къекIокIыхэрэм еплъыкIэу афыриIэр къедгъэIотагъ сэкъатныгъэ зиIэхэм я Уры­сые обществэ и Адыгэ республикэ организацие ипащэу Агъырджанэкъо Симэ.

— Урысыер Украинэм ау сыдми Пу­тиным ыгу къызэрэкIыгъэм пае ихьагъэп. «Сыда Урысыем иIоф зыкIыхилъхьагъэр, ежьхэм зэхарэфыжь» зыIохэрэр щыIэх. Бырсырэу Украинэм илъыр непэп къызежьагъэр, тэ иягъэу къытэ­кIыщтыгъэри, тапэкIэ зэрар къытфихьыным ищынагъо зэрэщыIагъэри зэкIэми тэшIэ. Илъэсийрэ типащэ ыщыIагъ, зэгорэм гъунэ фэхъун фэягъ.

Украинэм зао ришIылIэнэу, цIыфэу исхэр ыукIынхэу мурад зыфишIыжьы­гъэуи щытэп. Ахэм рэхьатныгъэ яIэ хъу­жьыным пай иIоф зыкIыхилъхьагъэр. ЕгъашIэм тызыкъэралыгъуагъ, тызызэ­хэкIыжьыми, гъунапкъэхэр тиIэ зэрэхъу­­гъэм фэдэу тыгукIэ тыгощыгъэ хъугъэп.

Игъоу сэлъытэ ти Президент ышIыгъэ лъэбэкъур. Ащ нэмыкI хэкIыпIэ щыIа­гъэп. Украинэм цIыф къызэрыкIоу исхэр хэгъэкIыри, дзэкIолIхэм язаохэрэп, Iэшэ зэфэшъхьафэу ежьхэм ядзэхэм агъэфедэрэр агъэкIодыныр ары пшъэрылъ шъхьаIэр. Ар зэкIэми къыдгурыIон фае.

Къэбар нэпцIэу къекIокIыхэрэм цIыф­хэр зэщачых, агъащтэх. Ахэм ядэIоу, зэблэзыхыхэрэм къясIомэ сшIоигъу: о унитIукIэ умылъэгъугъэу зэхэпхырэ пстэур пшIошъ бгъэхъунышъ, епхьыжьэнэу щытэп. Iофыр зытетыр ымышIэрэми, ежь зыфаер хигъахъозэ лъызыгъэкIуа­тэхэрэри щыIэх. А зэпстэур къыдэтлъы­тэн фае.

ЕтIани, Украинэм бырсыр илъыным федэ хэзыхыхэрэм ежьхэмкIэ нахьышIур ары къаIорэр. IэкIыб къэралхэу Украинэр къаухъумэ фэдэу зашIызэ, Iофыр зытет шъыпкъэр ашъхьэ рамыгъахьэу, къэбар нэпцIхэр къэзытIупщыхэрэр… Ахэми Урысыер къаубымэ ежьхэмкIэ нахь фед. Ащи удегупшысэн фае.

Гъэзетеджэхэм сэ сшъхьэкIэ сыкъяджэ къэбар мышъо-мылхэм зыдарамыгъэ­хьыхынэу. Владимир Путиным ышIагъэр мытэрэзэу зыIохэрэм адебгъэштэнэу щытэп. Нахьыжьэуи аущтэу зекIон фэя­гъэуи сэ сэлъытэ. «Нэпкъым тетыр къо­шъофыкIэ Iаз» аIуагъ. Чыжьэу ущытэу уасэ фэпшIыныр сыдигъокIи нахь псынкI, ау ар тэрэзэп.

ХЪУТ Нэфсэт.