Адыгеим ит гурыт еджэпIэ 13-мэ естественнэ-научнэ ыкIи технологическэ лъэныкъохэмкIэ гъэсэныгъэ гупчэу «Точка роста» зыфиIорэр къащызэIуахыгъ.

Ахэр Мыекъуапэ, Джэджэ, Красногвардейскэ, Кощхьэблэ, Мыекъопэ, Тэхъутэмыкъое, Теуцожь ыкIи Шэуджэн районхэм ащагъэпсыгъ.
«Точка роста» зыфиIорэ гупчэм икIэлэегъаджэхэм Iэмэ-псымакIэхэр къызфа­гъэфедэхэзэ кIэлэеджакIохэм ыкIи хьакIэу къекIолIагъэхэм мастер-классхэр къафагъэ­лъэгъуагъэх. Предметхэу хи­мием, физикэм, биологием, естественнэ-научнэ ыкIи тех­нологическэ лъэныкъохэмкIэ гъэсэныгъэ тедзэ ара­гъэ­гъотынымкIэ еджэгъу илъэсым къыкIоцI агъэфедэщтых. Лъэпкъ проектэу «Гъэсэныгъэм» ифедеральнэ проектэу «Джырэ еджапIэр» зыфиIорэм къыдыхэлъытагъэу гъэсэныгъэ гупчэм фытегъэпсыхьэгъэ классхэм ящыкIагъэр зэкIэ ачIагъэуцуагъэх.
— «Точка роста» зыфиIорэ гъэсэныгъэ гупчи 102-рэ Адыгеим иIэ хъугъэ, ахэм ащыщэу цифрэ ыкIи гума­нитар лъэныкъом афыте­гъэпсыхьэгъэ гупчэ 15, естественнэ-научнэ ыкIи техно­логическэ лъэныкъомкIэ 87-рэ мэхъух. Лъэпкъ проектэу «Гъэсэныгъэм» ишIуагъэкIэ къоджэ псэупIэхэм адэт гурыт еджапIэхэм ащеджэхэрэм лъэныкъо зэфэшъхьафхэмкIэ гъэсэныгъэ тедзэ арагъэгъотын амал яIэ хъугъэ. Джащ фэдэу ягукъэкIхэр щыIэны­гъэм щыпхыращынхэм, проект IофшIэнхэр агъэцэкIэнхэм фагъасэх. ЕджапIэм щеджэнхэр джы нахь ашIогъэшIэгъон зэрэхъугъэм тицыхьэ телъ, — еIо АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Пэрэныкъо Сусаннэ.
Шъугу къэдгъэкIыжьын, 2020-рэ илъэсым къыщегъэ­жьагъэу «Точка роста» зыфиIорэ гупчэхэр Адыгеим къыщызэIуахых. Мы илъэсым проектым игъэцэкIэн ыкIэм фэкIуагъ.