Адыгеим и ЛIышъхьэу КъумпIыл Мурат Мые­къуапэ имикрорайонэу Черемушкэм дэт IэзапIэм гъэцэкIэжьын ­IофшIэнэу рашIылIа­гъэхэм тыгъуасэ защи­гъэгъозагъ. Мы мафэм джыри республикэм ипащэ хэлажьэзэ, къутырэу Гавердовскэм ­амбулаторие къыщызэIуахыгъ.

Iофтхьабзэм хэлэжьагъэх АР-м ифедеральнэ инспектор шъхьаIэу Сергей Дрокиныр, АР-м и Къэралыгъо Совет — Хасэм и Тхьаматэу Владимир Нарожнэр, министрэ­хэм я Кабинет и Тхьаматэ игуадзэу Виктор Орловыр, АР-м псауныгъэр къэухъумэгъэнымкIэ иминистрэу Мэрэтыкъо Рустем, Къэралыгъо Советым — Хасэм икомитет итхьаматэу Наталья Широ­ковар, хэбзэ къулыкъухэм япащэхэр, псауныгъэм икъэу­хъумэн фэгъэзэгъэ Iофы­шIэ­хэр, студентхэр.
Псауныгъэм икъэухъумэнкIэ пэублэ къулыкъум игъэ­кIэжьын тегъэпсыхьэгъэ рес­­публикэ программэм къы­дыхэлъытагъэу мыщ фэдэ IофшIэнхэр зэхащагъэх. IэзапIэм игъэцэкIэжьын сомэ миллион 11,1-м ехъу пэIу­хьагъ. Ащ иджэхашъохэр, пчъэ, шъхьаныгъупчъэ блыпкъ­хэр ыкIи нэмыкIхэр зэблахъугъэх. Оборудо­ва­ниякIэу, мебелыкIэу къащэфыгъэм пэIухьэгъэ сомэ миллион 1,5-м ехъур респуб­ликэ бюджетым къыхэкIыгъ. Мыекъопэ къэлэ сымэджэщым иврач шъхьаIэу ЕмтIылъ Оксанэ къызэриIуагъэу, цIыфхэр нахь макIэрэ чэзыум хэтхэ, медицинэ фэIо-фашIэхэр нахьышIоу афагъэ­цакIэ хъугъэ. Джырэ шапхъэ­хэм адиштэу IэзапIэр зэтырагъэпсыхьагъ.

АгъэкIэжьыгъэ IэзапIэм Мыекъуапэ имикрорайонэу Черемушкэм дэсхэм яме­ди­цинэ фэIо-фашIэхэм ягъэцэ­кIэн диублэжьыгъ. Зы сме­нэм нэбгырэ 250-рэ мыщ щауплъэ­кIун алъэкIы. Диагностическэ, рентген ыкIи нэмыкI уплъэкIунхэри щашIых. Адыгеим и ЛIышъхьэ пшъэрылъ афишIыгъ медицинэ фэIо-фашIэхэр нахьышIоу афэгъэцэкIэгъэн­хэмкIэ амалхэр зэрахьанэу, IэзапIэм къыпэIулъ чIыпIэм изэтегъэпсыхьан аухынэу.
Медицинэ фэIо-фашIэхэм ягъэцэкIэнкIэ къутырэу Гавердовскэми амалыкIэхэр иIэхэ хъугъэ. Джырэ шапхъэхэм ади­штэрэ амбулаториеу мыщ щагъэпсыгъэм сомэ миллион 42-м ехъу пэIухьагъ. Медицинэ оборудованиемрэ мебелымрэ апае сомэ миллиони 6 фэдиз къыхагъэкIыгъагъ. Квадрат метрэ 420-рэ зэлъызыубытырэ IэзапIэм зы сменэм нэбгырэ 50-мэ ямедицинэ фэIо-фашIэхэр щагъэцэкIэнхэ алъэкIыщт. КIэлэцIыкIу отделениеу ащ хэтым врач-педиатрэм Iоф щишIэщт. Нахьыжъхэм атегъэпсыхьэгъэ отделе­нием Iут терапевтым, ги­некологым, стоматологым зы­фагъэ­зэн алъэкIыщт.
Адыгеим и ЛIышъхьэ ам­булато­риер къыплъыхьагъ, меди­цинэ IофышIэхэмрэ къутырым дэсхэмрэ адэгущыIагъ. Ахэм ынаIэ къызэратыригъэтырэм ыкIи япсэупIэ зэхъокIыныгъэшIухэр зэрэфэхъухэрэм афэшI КъумпIыл Мурат «тхьауегъэ­псэу» къыраIуагъ. КъумпIыл Мурат Гавердовскэм дэсхэм игъо афилъэгъугъ гъэпсын Iоф­шIэнхэм чанэу ахэлэжьэнхэу, япсэу­пIэ изэтегъэпсыхьан епхыгъэ Iофыгъохэр зэгъусэхэу зэшIуа­хынхэу, социальнэ мэхьанэ зиIэ проектхэм ахэлэ­жьэнхэу. Амбулаторием къыпэ­Iулъ чIыпIэм изэтегъэпсыхьанкIэ цIыфхэм игъоу алъэгъухэрэр къыдалъы­тэнхэу АР-м и ЛIы­шъхьэ пшъэрылъ афишIыгъ.

АР-м и ЛIышъхьэ медицинэ IофышIэхэм адэгущыIэ зэхъум цIыфхэр диспансеризацием къыхегъэубытэгъэнхэм, специа­лист ныбжьыкIэхэм ягъэхьазырын япхыгъэ Iофыгъохэм лъэшэу ынаIэ атыригъэтыгъ.
«Мы аужырэ лъэхъаным УФ-м и Президентэу Владимир Путиныр, УФ-м и Правительствэ, партиеу «Единэ Россиер» яIэпыIэгъоу псауныгъэм икъэухъу­мэн фэгъэзэгъэ къулыкъур джы­рэ шапхъэхэм адиштэу зэтегъэпсыхьэгъэнымкIэ рес­публикэм Iофышхо щызэшIуа­хыгъ. Учреждениябэ дгъэцэ­кIэжьыгъ, сымэджэщхэр, IэзапIэхэр, фельдшер-мамыку IэзапIэхэр, амбулаториехэр дгъэ­псыгъэх. Проектхэм ренэу та­хэIэзыхьажьы. Мы IэзапIэр анахь дэгъухэм ащыщ. Врачхэм Iоф ашIэнымкIэ, сымаджэхэм яIэзэгъэнымкIэ амал дэгъухэр мыщ щызэхэщагъэх, джырэ уахътэм диштэрэ оборудование чIэт. ДжырэкIэ мэхьанэшхо зиIэр къутырым дэсхэм медицинэ IэпыIэгъу дэгъу арагъэ­гъотыныр, къазэрафэгумэкIы­хэрэр ахэм зэхашIэныр ары. Джащ фэдэу вакцинациемрэ диспансеризациемрэ яхьылIэгъэ пэшIорыгъэшъ, информационнэ IофшIэнхэмкIи ахэр IэпыIэгъу-
шIу хъунхэ алъэкIыщт», — къы­Iуагъ КъумпIыл Мурат.

Адыгэ Республикэм псауныгъэр къэухъумэгъэнымкIэ ипэублэ къулыкъу гъэкIэжьыгъэным тегъэпсыхьэгъэ шъолъыр программэм диштэу 2021-рэ илъэ­сым къыщегъэжьагъэу 2023-рэ илъэсым нэс оборудованиякIэ, автомобильхэр къащэфыгъэх, псауныгъэм икъэухъумэн фэ­гъэзэгъэ псэолъи 6 агъэпсыгъ, джащ фэдиз псэуалъи агъэцэ­кIэжьыгъ. 2024-рэ илъэсым псэолъи 7-мэ Iоф адашIагъ. А зы уахътэм амбулатории 5-мэ ягъэпсын зэдыфежьагъэх. Къи­хьащт илъэсым ахэр атыщтых. Джащ фэдэу 2025-рэ илъэсым амбулатории 2 ашIынэу рахъу­хьэ. ПсэупIэу Инэм щагъэпсырэ IэзапIэм ишIын ыкIэм фэкIо.
АР-м и ЛIышъхьэ ипресс-къулыкъу къытыгъэ къэбархэмкIэ
ЛIышэ Саныет.
Сурэтхэр: А. Гусев.