Адыгеим имуниципальнэ образованиеу апэу лIэшIэгъу мэфэкIыр хэзыгъэунэфыкIырэр Красногвардейскэ рай­оныр ары. Социальнэ-экономическэ хэхъоныгъэ­хэмкIэ ар и мафэ пэгъокIыгъ.

Аужырэ илъэситфым псэолъэкIэ зэфэшъхьа­фыбэ псэупIэхэм аща­гъэуцугъ, щыIагъэхэр лъэ­хъаным диштэу зэтыра­гъэпсыхьажьыгъэх. Анахь шъхьаIэхэм ягугъу къэтшIын.
Лъэпкъ проектэу «Демографием» къыдыхэ­лъытагъэу къуаджэу Хьатикъуае, псэупIэхэу Бе­лэм, Садовэм кIэлэцIыкIу IыгъыпIэхэр ащашIыгъэх. Ахэр нэбгыри 120-рэ зырыз ачIэфэным те­лъытагъ.
Мы проект дэдэм ишIуа­гъэкIэ физкультурэм зыщыпылъхэ ыкIи япсауныгъэ зыщызэтырагъэуцо­жьырэ комплексэу «Кавказыр» район гупчэм къы­щызэIуахыгъ. ПстэумкIи сомэ миллиони 109-рэ ащ тефагъ. Къуаджэу Улапэ ащ фэдэ псэуалъэу щашIыгъэри мы лъэпкъ проектым къыдыхэлъы­тагъ.
Ахэм анэмыкIэу «Къо­джэ псэупIэхэм хэхъоныгъэ ягъэшIыгъэныр» зыфиIорэ къэралыгъо программэм ишIуагъэкIэ псэу­пIэу Еленовскэм иеджапIэ спортзал фашIыгъ.

Районым иеджапIэхэм ащыщхэм гъэсэныгъэм и Гупчэу «Точка роста» зыфиIорэр къащызэIуа­хыгъ.
Илъэси 5-м культурэм епхыгъэ псэуалъэу районым итыр, зэкI пIоми хъу­нэу, агъэцэкIэжьыгъ, псэу­пIэу Белэм кIэу щашIыгъ. Еленовскэм культурэм и Унэу дэтыр «Къоджэ псэу­пIэхэм хэхъоныгъэ ягъэшIыгъэныр» зыфиIорэ къэ­ралыгъо программэм къыдыхэлъытагъэу зэтырагъэпсыхьажьыгъ. Ащ сомэ миллион 70-м ехъу пэIухьагъ.
Къуаджэу Адэмые ащ фэдэ иунэ лъэпкъ проектэу «Культурэм» ишIуа­гъэкIэ лъэхъаным диштэу агъэкIэжьыгъ. ПстэумкIи сомэ миллион 25-рэ тефагъ. Район гупчэм культурэм и Унэу дэтым игъэ­кIэжьыни ащ фэдиз пэIухьагъэр.
Къуаджэу Хьатикъуае къыщызэIуахыгъэ мо­дель­нэ тхылъеджапIэр лъэ хъа­ным къыздихьыгъэ- псэуа­лъэхэмкIэ зэтегъэ­псы­хьагъ, Лъэпкъ электроннэ тхылъеджапIэм зэпхыныгъэ дыриI, нэ­мыкI амалхэри ащ къетых.

ИскусствэхэмкIэ кIэлэцIыкIу еджапIэри зэты­рагъэпсыхьажьыгъэхэм ащыщ. Ащ фабэм, электричествэм якIуапIэхэр, машIо къэхъумэ макъэ зыгъэIущт системэр щызэблахъугъэх, иджэхашъо агъэкIэжьыгъ, щагур зэтырагъэпсыхьагъ.
Адэмые щыпсэухэрэмкIэ шIухьафтын хъугъэ къоджэ мэщытыр зэра­гъэцэкIэжьыгъэр, ащ къы­пэIулъ чIыпIэр зэрэзэтырагъэпсыхьагъэр.
Мы псэупIэ дэдэм иура­мэу гурыт еджапIэмрэ кIэлэцIыкIу IыгъыпIэмрэ зытетхэм лъэсрыкIо гъогу километри 5,5-рэ хъоу щашIыгъ. Сомэ миллион 19 республикэм игъогу фонд къыхэхыгъэу ащ пэ­Iуагъэхьагъ.
Гъэстыныпхъэ шхъуан­тIэр зимыIэхэм аIэкIэгъэ­хьэгъэным епхыгъэ Iоф­шIэнхэри районым щы­зэшIуахых. ГущыIэм пае, псэупIэу Еленовскэм иура­мэу Есиным ыцIэ зыхьырэм гъэстыныпхъэ шхъуан­тIэм икIуапIэхэр щагъэ­псы­гъэх. Сомэ мин 960-рэ фэдиз ащ пэIухьагъ.
Къутырэу Богурсуково зыфиIорэм псэупIэхэр зэзыпхырэ гъогу кило­метри 2 щашIыгъ, нэмыкI псэуалъэу гъэстыныпхъэ шхъуантIэм итын фыте­гъэпсыхьагъэхэр щагъэуцугъэх. Ащ ишIуагъэкIэ унэ 40-м ехъумэ газыр ара­щэн амал щыIэ хъугъэ.

Псэу цIыфхэр зашъо­хэрэр шапхъэхэм ади­штэнми мы муниципальнэ об­разованием лъэшэу щы­пылъых. ГущыIэм пае, къуаджэу Хьатикъуае иура­мэу Полевоим псым икIуапIэхэр щызэблахъугъэх, нэмыкIэу ащ ищыкIагъэхэр щагъэпсыгъэх. ЗэкIэмкIи сомэ миллион фэдиз ащ тефагъ.
2022-рэ илъэсым Большесидоровскэ псэупIэ ко­им псырыкIуапIэу километрэ 15 кIэу щашIыгъ. Сомэ миллион 19,4-рэ пэIуагъэхьагъ. Къуаджэу Улапэ псыкъычIэщыпIэу щашIыгъэм сомэ миллион 25,6-рэ тефагъ.
Джащ фэдэу Красно­гвардейскэм иурамэу Первомайскэм гъогу Iа­хьэу километри 3 хъурэр, псэупIэу Преображенскэм иурам шъхьаIэу Комминтернэм игъогу агъэцэ­кIэ­жьыгъэх.
Красногвардейскэм икIэу Улапэ зэпичызэ по­селкэу Заревэм кIорэ ав­томобиль гъогум хьы­лъэзещэ автомашинэхэр къэзыщэчырэ псэуалъэ ща­гъэуцугъ. Гъогухэр къы­зэтегъэнэгъэнхэм ыкIи ахэр щынэгъончъэнхэм фытегъэпсыхьагъэу зэ­шIуахыхэрэм ар ащыщ.
Мыгъэ «Къоджэ псэу­пIэхэм хэхъоныгъэ ягъэшIыгъэныр» зыфиIорэ программэм къыдыхэ­лъытагъэу район гупчэм культурэм и Унэу дэтымрэ кIэлэцIыкIухэм ыкIи зи­хэхъогъухэм зызщагъэсэрэ спорт еджапIэр зы­чIэтымрэ агъэкIэжьых. ПстэумкIи ахэм сомэ мил­лиони 125-рэ апэIу­хьащт.
Ахэм анэмыкIэу къуа­джэу Улапэ дэт еджапIэр агъэцэкIэжьы. Ар лъэхъа­ным диштэу зэрэзэтырагъэпсыхьащтым имыза­къоу, модельнэ тхылъеджа­пIэ кIэу хагъэуцощт.
Гъэзетэу «Зэкъошны­гъэм» («Дружбэм») ­къытыгъэ къэбархэмкIэ
зыгъэхьазырыгъэр ХЪУТ Нэфсэт.
Сурэтхэр: гъэзетым ире­дакций.