Ары, мэзхэр баиныгъэ шъхьаIэу республикэм иIэхэм ащыщых. ПстэумкIи гектар мин 336,3-рэ мэхъух.

Ащ щыщэу мин 238,7-р, процент 71-р, республикэм имэз фонд хэхьэ, гектар мин 91,5-р, процент 27-р, анахь къагъэ­гъунэрэ природнэ чIыгухэм аубыты, гектар мини 6,1-р зыкъэухъумэжьынымкIэ къулыкъум ичIыгу­хэм къащэкIы.
АР-м имэзхэм я ГъэIорышIапIэ къызэрэщытаIуагъэмкIэ, тишъолъыр имэз фонд щыщэу чIы зэшъхьэ-зашъом къыщыкIырэр макIэ. Джэджэ районым имэзхэм фондым щыщэу зы процентрэ ныкъорэ аубыты, Теуцожь районым ичIыгу­хэм атетыр проценти 8 мэхъу. Анахьыбэу тимэзхэм зэлъаубытырэр Адыгеим икъушъхьэ чIыпIэхэр ары. Ахэр Мые­къопэ районым щыIэх.
Тимэзхэм хвой лъэпкъхэу «Кавказская пихта» зыфаIорэр, «псэй» тэ тызэреджэрэр, пхъэ пытэ къэзытырэ чъыг лъэпкъ­хэу (твердолиственные) чъыгаер, тфэир, грабыр, кIаир, пхъэ шъабэкIэ заджэхэрэ (мягколиственные) ныхаер, екIапцIэр, пчэир, бзыфыр ары нахьыбэу къащыкIыхэрэр. Ахэм процент 94-р аубы­ты. Къужъы, дэшхо, шхъомчы, ланчъэ зыфэпIощтхэр проценти 6 ныIэп зэрэхъухэрэр.
Адыгеим имэз фонд къэзыгъэпсырэ чъыг лъэпкъхэм, гурытымкIэ лъытагъэу, илъэс 91-рэ къагъашIэ. Ахэм «анахьыкIэхэм» илъэс 57-рэ, «анахьыжъхэр» псэйхэр ары, илъэс 207-рэ фэдиз аныбжь.