Лъэпкъ тхыгъэм ымакъэ зыгъэIурэр
УсакIоу, тхакIоу, драматургэу, Къэбэртэе-Бэлъкъарым игъэзетэу «Горянка» зыфиIорэм иредактор шъхьаIэу Къаныкъо Заринэ итхылъыкIэу «Iошъхьэмафэ, Мэфэгъэпс» илъэтегъэуцо Москва щыкIуагъ.
Урысыем къыщыдагъэкIырэ тхылъхэм яфестивалэу «Красная площадь» зыцIэм ыкIи къэралыгъом щыпсэурэ лъэпкъхэм ялитературэ ифестиваль ар ахэлэжьагъ.
Пчэгу Плъыжьым Урысыем ыкIи Белоруссием ятхылътедзэпIэ 400-мэ ялIыкIохэр къыщызэрэугъоигъагъэх. Iофтхьэбзэ зэфэшъхьафыбэ ащ щыкIуагъ: романыкIэхэм, научнэ-популярнэ ушэтынхэм ялъэтегъэуцохэр, концертхэр, спектаклэхэр, кIэлэцIыкIухэм апае десэ-зэхэщэнхэр.
Къаныкъо Заринэ ироманэу «Iошъхьэмафэ, Мэфэгъэпс» («Придет и мой махо») илъэтегъэуцо хэлэжьагъэх УФ-м и Къэралыгъо Думэ идепутатэу Виктория Родинар, Адыгэ Республикэм ыцIэкIэ УФ-м и Федеральнэ ЗэIукIэ ФедерациемкIэ и Совет исенаторэу Хъопсэрыкъо Мурат, Урысыем ис цIыф лъэпкъхэм яныдэлъфыбзэхэм яинститут иIофышIэхэр, сурэтышIхэр, артистхэр, Москва иапшъэрэ еджапIэхэм ястудентхэр, адыгэу дэсхэр.
Къаныкъо Заринэ зэрэхигъэунэфыкIыгъэмкIэ, ныдэлъфыбзэмрэ лъэпкъ литературэмрэ Москва игугъу зэрэщашIырэм мэхьанэшхо иI. Нэпх реализмэм ижанрэ итэу Къаныкъо Заринэ ытхыгъэ романыр къызтегущыIэрэр тхакIом ичIыпIэ гупсэу Баксан къушъхьэ тIуакIэм дэт къуаджэу Дыгулыбгъуей. Хэгъэгу зэошхом ыкIи я 90-рэ илъэсхэм яхъугъэ-шIагъэхэр тхыгъэм къыщыгъэлъэгъуагъэх. Романым игерой шъхьаIэ я 115-рэ Кавказ дивизием хэтыгъэ дзэкIолIхэм яшIэжь ыгъэлъапIэ шIоигъоу саугъэт афешIы. Нэмыц разведкэм хэтыгъэхэм Iэшъхьэмафэ пэIулъ чIыпIэхэр къызкIыхагъэщыщтыгъэхэр зыушэтыхэрэри къахэкIых. ЦIыф къызэрыкIохэм яшIулъэгъу ишIуагъэкIэ яIахьыл-благъэхэр зыхэфэрэ къиныгъохэм ащаухъумэшъух, адеIэх.
ЗипчъагъэкIэ 300 хъурэ тхылъыр фестивалым щызэбгырыкIыгъ, къыдагъэкIыжьыным егупшысэх. Романым иаудиоверсие мэзищым къыкIоцI нэбгырэ 3500-рэ едэIугъ. Къаныкъо Заринэ къызэриIуагъэмкIэ, кIэлакIэхэм апае тхылъищ хъоу «фэнтези» жанрэм итэу къыдигъэкIыщт тхыгъэм джыдэдэм Iоф дешIэ. Адыгэ литературэм ащ фэдэ джыри хэтыгъэп. Лъэпкъ литературэм илъэныкъуакIэ икъызэIухын къыдэхъунэу тыщэгугъы.