Адыгеим ифутбол шIукIэ щашIэ Анатолий Абрамовыр. Мые­къопэ «Зэкъошныгъэм» илъэсыбэрэ ар щешIагъ. Къэлапчъэм Iэгуаор гъогогъуи 100-м нахьыбэрэ дидзагъ. Игъонэмысэу идунай зыхъожьыгъэ А. Абрамовыр тщыгъупшэрэп, илъэс къэс ащ фэгъэхьыгъэ зэIукIэгъухэр Мыекъуапэ щызэхащэх.

Анатолий Абрамовым и Кубок икъыдэхын фэгъэхьыгъэ зэнэкъо­къухэр дэгъоу зэхащэнхэм фэшI судьяхэм япшъэрылъхэр зэрагъэ­цакIэхэрэм мэхьэнэ ин иI. Мые­къуапэ иадминистрацие испорт­комитет ар къыдилъыти, опыт зиIэ судьяхэр ыгъэнэфагъэх. Вадим Манашировыр, Максим Васильченкэр, Шэуджэн Хьасанбый, Сергей Новиковыр зэнэкъо­-
къухэм ясудьяу щытых.

- ЗэIукIэгъумэ ахэлэжьэрэ командэхэр илъэс къэс нахьыбэ мэ­хъух. Футбол ешIапIэу тиIэхэми япчъагъи хэхъо, - еIо зэнэкъо­къухэм ясудья шъхьаIэу Пэнэшъу Мыхьамодэ. - Курганинскэ къи­кIы­гъэ командэм гъогогъуищэ губернаторым ишIухьафтынхэр Краснодар краим къыщыдихыгъэх.

Апэрэ зэIукIэгъухэр зэраухыгъэ­хэр: «Спорттур» - «Фыщт» - 2:5, ДЮСШ - «Инфор» - 11:1, МГГТК - «Лавина» - 3:3 (пе­нальтикIэ 2:4), «Курганинск» - «Кристалл» - 10:3, «Приставхэр» - «Арабик» - 12:3.

«Барселона», «Риспект», «Ме­белышI», «Олимп», нэмыкIхэри зэIукIэгъумэ ахэлажьэх. Зичэ­-
зыу ешIэгъухэр гъэтхапэм и 13 - 14-м стадионыкIэу «Юностым» щыкIощтых. Хьакурынэхьаблэ иныбжьыкIэ командэу ДЮСШ-р, «Фыщтыр», «Барселонэр», «Приставхэр», фэшъхьафхэри апэрэ чIыпIэхэм афэбанэх.

Сурэтыр Хьакурынэхьаблэ икомандэу ДЮСШ-мрэ «Инфоррэ» язэIукIэгъу къыщытырахыгъ.