Мы лъэхъаным ти­щыIэныгъэ гумэкIыгъоу тызыщырихьылIэхэрэм ащыщ ВИЧ-инфекцием зызэриушъомбгъурэр, а зэпахырэ уз щынагъом икIэухэу хъурэ СПИД-м илIыкIырэм зэрэхахъорэр. Къэралыгъор зэрэпсаоу пштэмэ, а узым зэрарэу къыхьырэр къэлъы­тэгъуай, экономикэм ылъэныкъокIи, демографием изытети ащ «илъэ­ужхэр» къахэщых.

ГухэкI нахь мышIэми, Адыгеими а гумэкIы­гъохэм ащиу­хьагъэп. Илъэси 10 - 15 горэкIэ узэкIэIэбэжьымэ, ВИЧ-инфекцием ащ фэдизэу игугъу амышIы­щтыгъэмэ, сымаджэу тиIэри мэкIэ дэдагъэмэ, джы ащ тетыжьэп. Тэ­шIэ бзылъфыгъэхэри кIэлэцIы­кIухэри диспансер учетым хэтхэ зэрэ­хъугъэр, мыхэр а узым щыухъумагъэхэу зэрэщымытхэр.

СПИД-м ыкIи зэпахырэ узхэм апэуцужьы­гъэнымкIэ Адыгэ рес­публикэ Гупчэм къытырэ пчъагъэхэм къызэ­рагъэлъагъорэмкIэ, тызыхэт илъэсым иапэрэ мазэ ехъулIэу мыхэм ядиспансер учет нэбгырэ 254-рэ хэтыгъ.

ВИЧ-инфекциер къызыхагъэщыгъэхэм ыпкIэ хэмылъэу Iэзэгъу уцхэр ягъэгъотыгъэнхэр лъэпкъ проектэу «Псауныгъ» зыфиIорэм къыделъытэ. А проектым ишIуагъэкIэ антиретровируснэ препаратхэр нэбгырэ 46-мэ мы лъэхъаным араты. Мыхэм анэмыкIэу, антиретро-вируснэ терапиер зэра­гъэхьыхэрэм ахэтых УИН-м иучреждениеу Адыгеим итхэм ачIэсхэм ащыщхэри (нэбгыри 5).

ЖакIэмыкъо Аминэт.