ИшIушIагъэкIэ къытхэт, ипсынэкIэчъ мычъакъоу непи къыддэлажьэу тэ­лъы­тэ. Адыгэ Республикэм культурэмкIэ иапэрэ министрагъэу, АР-м бас­кет­бо­лымкIэ ифедерацие иапэрэ президентыгъэу Хьа­нэхъу Адамэ фэ­гъэ­хьы­гъэ зэнэ­къокъухэу Мые­къуа­пэ щы­кIуагъэмэ бас­кет­бол командитф ахэлэжьагъ.

- ИлъэсипшI хъугъэ Хьанэхъу Адамэ идунай зихъожьыгъэр, - еIо СССР-м спортымкIэ имастерэу, зэнэкъокъухэм ясудья шъхьа­Iэу Сергей Золотцевым. - Адыге­им ибаскетбол командэ Урысыем изэнэкъокъухэм ахэлэжьэным кIэщакIо ар фэхъугъагъ. Мыекъо­пэ «Динамэр» суперлигэм илъэсы­бэрэ хэтыгъ. Урысыем икомандэ анахь лъэшхэм тибаскетболистхэр адешIэщтыгъэх. ЦСКА-р ары ны­Iэп «Динамэр» зытемыкIуагъэр. Мыекъуапэ щагъэсэгъэ Валентин Кубраковыр Урысыем ихэшыпы­кIыгъэ командэ хэтэу ­Олимпиадэ джэгунхэм ахэлэжьагъ.

Хьанэхъу Адамэ ишIуагъэкIэ Адыгеим баскетбол командэ лъэш иIэ хъугъэ. КIэлэцIыкIухэмрэ ныб­жьыкIэхэмрэ спортым пыщэ-
гъэнхэм фэшI баскетболымкIэ ­федерацием Iофыгъуабэ ыгъэцэ­кIагъ. Мыекъуапэ баскетбол коман­дэу щызэхащагъэр макIэп, ау Адыгеим ирайонхэм баскетболышхор икъоу алъыIэсыгъэп. Хьанэхъу Адамэ фэгъэхьыгъэ зэнэ-
къо­къухэм, нэмыкI зэIукIэгъухэм Адыгэкъалэ, тирайонхэм якомандэ лъэшхэр ащытлъэгъухэ тшIоигъу.

- Сигуапэу зэIукIэгъумэ ся­плъы, зэнэкъокъумэ язэхэщэн сыпылъ, - еIо Хьанэхъу Адамэ иныбджэгъушIугъэмэ ащыщэу Станислав Кустре. - Адамэ ицIы­фы­гъэкIэ, гукIэгъоу хэлъымкIэ ты­зэрищалIэщтыгъ. КъэкIощт илъэ­сым Мыекъуапэ щыкIощт зэнэ­къокъухэр нахь гъэшIэгъон хъу­нэу сэгугъэ.

- Хьанэхъу Адамэ спортым лъэужэу къыщигъэнагъэм тырэкIо, - къыщиIуагъ зэнэкъокъухэр зыщызэфахьысыжьыгъэ зэ-
хахьэм АР-м гъэсэныгъэмрэ шIэныгъэмрэкIэ и Министерствэ и СДЮСШОР идиректорэу Хьа­кIэмызэ Аслъан. - ЩыIэныгъэм еплъыкIэу фыриIэр иIофшIакIэ хэтлъагъощтыгъ. КъэкIощт илъэсым Адыгеим ирайонхэм, Къыблэ шъолъырым якомандэхэр зэнэ­къокъухэм ахэдгъэлэжьэнхэм тыпылъыщт.

Спортым изакъоп Хьанэхъу Адамэ ишIэныгъэ зыхилъхьагъэр. АР-м иминистрэу илъэсиблэ Iоф ышIагъ. А уахътэм къыкIоцI дунаим цIэрыIо щыхъугъэ орэдыIо-къэшъокIо ансамблэу «Ислъамыер» пытэу ылъэ теуцуагъ, лъэпкъ музыкальнэ искусствэм хэхъоныгъэ инхэр ышIыгъэх. Адыгэ Республикэм и Къэралыгъо филармоние, симфоническэ оркестрэр, ансамблэу «Русская удалыр», купэу «Ошъутенэр», камернэ музыкальнэ театрэр, нэмыкIхэри А. Хьа­нэ­хъум ишIуагъэкIэ Адыгеим щызэ­хащагъэх. Камернэ музыкальнэ театрэм Хьанэхъу Адамэ ыцIэкIэ еджагъэх. Художественнэ пащэу, УФ-м искусствэхэмкIэ изаслуженнэ IофышIэшхоу Сулейманов Юныс къызэ­рэ­тиIуагъэу, АР-м иму­зы­кальнэ искусствэ лъэбэкъоу ыдзыгъэхэр Хьанэхъу Адамэ ишIу­шIа­гъэмэ къапкъырыкIыгъэх.

ЗэхэщэкIо дэгъоу зэрэщытым дакIоу, музыкэм зэрэфэгъэсагъэри искусствэм хэшIыкI фызиIэмэ къатхыщтыгъ. Симфоническэ оркестрэм идирижерэу, Эстонием инароднэ артистэу Роман Матсовым гущыIэгъу тыфэхъоу зэп къызэрэхэ­кIы­гъэр.

ЗэлъашIэрэ композиторэу Бетховен ипроизведение Хьанэхъу Адамэ оркестрэмрэ хорымрэ игъу­сэхэу пиани­нэм­кIэ къыри­гъэIуагъ. Концертыр зэрэкIуа­гъэм Роман Матсовыр ыгъэгу­шIуагъ. КультурэмкIэ министрэр пианинэм кIэ­лъырысэу зэри­лъэ­гъугъэми осэ ин ри­ты­гъ. А. Хьанэхъур баскетбол дэгъоу зэ­решIэрэр Роман Матсовым зыраIом щхы­гъэ, нэ­шIукIэ Хьанэ­хъу Адамэ еплъыгъ. А уахътэр сщыгъу­пшэрэп - ми­нист­рэр министрэ шъыпкъэу щы­Iэныгъэр къызы­гу­рыIорэмэ алъытэщтыгъ.

Унэгъо дахэ иIэу Хьанэхъу Адамэ псэущтыгъ. Краснодар Iоф щи­шIэу зеублэм Адыгеир зыщи­гъэ­гъупшэщтыгъэп. Пчыхьэзэха­хьэм, спорт зэнэкъокъухэм ахэлажьэ­щтыгъ.

ЯпшIэнэрэу зэхащагъ

Автомобиль гъогум тхьамы­кIагъоу техъухьагъэм Хьанэхъу Адамэ зыхэкIодагъэр илъэсипшI хъугъэ. БаскетболымкIэ АР-м ифедерацие иапэрэ президент фэ­гъэхьыгъэ зэнэкъокъухэр мэзаем и 24-м къыщыублагъэу гъэтхапэм  и 1-м нэс кIуагъэх.

Апэрэ чIыпIэр мыекъопэ ЛПУМГ-м къыдихыгъ. ЕшIэ­гъуи­плIыри къин къыщымыхъоу ­къыхьыгъэх. ЯтIонэрэ чIыпIэр ­«Ветераным» фагъэшъошагъ. СДЮСШОР-2-р ящэнэрэ хъугъэ. Адыгэ къэралыгъо университе-
тым икомандэ аужырэ чIыпIэр къыдихыгъэми, дэеу ешIагъэу зы­ми къытиIуагъэп.

ЯIэпэIэсэныгъэкIэ къахэщыгъэ спортсменхэу шIухьафтынхэр зы­фашIыгъэхэм тигуапэу ацIэ къе­тэIо. Алексей Александровыр, Роман Соколовыр, Блэгъожъ Къэ­плъан, Владимир Ткаченкэр, Егор Мартьяновыр анахь  дэгъоу ешIа­гъэхэу зэхэщакIомэ къыхахыгъэх.

Зэнэкъокъухэр мыекъопэ СДЮСШОР-2-м, директорыр Виктор Босенко, зэхищагъ. Хьанэхъу Адамэ ныбджэгъушIоу иIа­гъэхэри зэхэщакIомэ IэпыIэгъу ­къафэхъугъэх. Мыекъопэ баскетбол командэу «Динамэм» итренер шъхьаIэу, АР-м изаслуженнэ тренерэу Андрей Синельниковыр тикомандэ игъусэу Воронежрэ Курскэрэ ащыIагъ. Мые­къуапэ къызегъэзэжьым баскетбол зэрешIэщт шъуашэр зыщилъи, зэнэкъокъухэм ахэлэжьагъ. Хъурджанэм Iэгуаор пчъагъэрэ А. Синельниковым ридзагъ.

- ИшIушIагъэкIэ Хьанэхъу Адамэ къытхэт къодыеп, тапэкIэ тызэрэлъыкIотэщт шIыкIэм тыфигъасэу сэлъытэ, - еIо Андрей Синельниковым. - Тыгу къео тиныбджэгъушIу бэгъашIэ зэрэмыхъугъэр. Мыекъопэ «Динамэр» ащ лъэшэу фэраз.

Философие шIэныгъэхэмкIэ док­торэу Хьанэхъу Руслъанэ зэнэкъокъухэр зэрэкIуагъэхэм ­яплъыгъ - ар Адамэ ышнахьыжъ. СССР-м изаслуженнэ тренерэу Кобл Якъуби шIогъэшIэгъонэу зэ­IукIэгъухэм алъыплъагъ. Хьанэхъу Адамэ исэнэхьат къыфэхъугъэ цIыфхэм ахилъытагъ.

- Мыекъопэ музыкальнэ училищым сыщеджэнэу зесэгъа­жьэм директорэу Хьанэхъу Адамэ тиIагъ, - къеIуатэ баскетболымкIэ зэнэкъокъухэу тикъалэ щыкIуа­гъэмэ яплъыгъэу, тарихъ шIэны­гъэхэмкIэ докторэу, профессорэу, Адыгэ Республикэм икомпозитормэ я Союз итхьаматэу Къэгъэзэжь Байзэт. - ШIэныгъэ зэрэзэбгъэгъотыщт шIыкIэм Хьанэхъу Адамэ уфигъэсэн ылъэкIыщтыгъ. КъызыоушъыикIэ гущыIэ бащэ къыуиIоныр ишэныгъэп.

- Зэнэкъокъухэр баскетбо­лымкIэ дэгъоу кIуагъэх, - къы­щиIуагъ кIэух зэхахьэм Хьанэхъу Руслъанэ. - Баскетбол шъузэ­-
ре­шIэрэм сеплъы, сшынахьыкIэ ехьы­лIэгъэ къэбарэу къэшъуIуа­тэрэмэ сыкъядэIу зыхъукIэ, Адамэ псэ пытэу, къыдготэу къысщэхъу. Тхьаегъэпсэух зэхэщакIохэр, спортсменэу хэлэжьагъэхэр. Адыге­им ибаскетбол ыпэкIэ зэрэлъы­кIотэщтым сицыхьэ телъ.

ЗэхэщакIохэм Хьанэхъу Адамэ ехьылIэгъэ къэгъэлъэгъонхэр спорт еджапIэм къыщы­зэIуа­хы­гъэх. ЦIыфэу къэкIуагъэхэм шIукIэ Хьа­нэхъу Адамэ агу къагъэ­кIы­жьыгъ.