Театральнэ искусст­вэм­кIэ Санкт-Петербург дэт академиер КIыкI Софэ къыухыгъ. Профессорэу Александр Петровыр ипащэу исэнэхьат зэри­гъэгъотыгъ. Санкт-Петербург къэралыгъо кон­серваторием щеджэ. Адыгэ Республикэм и Къэралыгъо филармоние исимфоническэ оркестрэ игъусэу КIыкI Софэ джырэблагъэ Мые­къуапэ концерт къызыщетым гущыIэгъу тыфэ­хъугъ.

- Санкт-Петербург еджа­кIо укIоным ыпэкIэ искусст­вэхэмкIэ Адыгэ республикэ колледжыр «5»-кIэ къызэрэуухы­гъэр сэшIэ. Уисэнэхьат уфе­джэныр орыкIэ сыда?

- Сыд фэдэ лъэхъанэ пшта­гъэ­ми, сэнэхьат хэхыгъэ уиIэн фае. Мыекъуапэ кIэлэегъаджэу щысиIэгъэ Даутэ Сарыет мафэ къэс пIоми хъунэу сынэгу кIэт, къысфигъэпытэзэ къызэрэздэ­-
гу­щыIэщтыгъэр, игупшысакIэ къыслъигъэIэсы зэрэшIоигъуа­гъэр сщыгъупшэхэрэп.

- Болгарием, Санкт-Петербург ащыкIогъэ Дунэе фестиваль-зэнэкъокъумэ уахэлэжьагъ, щытхъуцIэхэр къазэрэщыдэпхыгъэм фэшI тыпфэ­гушIо.

- Тхьауегъэпсэу. Фестивальхэр зэнэкъокъухэу зэрэщытхэр нахьышIу. Iоф зыдэпшIэжьызэ къыбгот артистхэм уакIырэплъы. Елена Образцовам тызыIокIэм искусствэм ишъэфхэр къызэ­пкъы­рихыгъэх. Ащ фэдэ зэдэгу­щы­Iэ­­гъухэр тищыкIагъэх.

- Софа, филармонием къыщыптыгъэ концертым классикэм хэхьэгъэ произведениехэр къыщыпIуагъэх. Санкт-Петербург щыкIорэ пчыхьэзэхахьэмэ уахэлажьэба?

- Римский-Корсаковым ыцIэ зыхьырэ консерваториер къэсэухы. Опернэ орэдыIоу сыщытми, эстрадэм, лирикэм афэгъэхьыгъэ орэдхэр концертхэм ахэсэгъа­-
хьэх. Музыкальнэ театрэм Iоф щы­сэшIэ.

- Санкт-Петербург ущэ­псэуми Адыгэ Республикэм имэ­фэкI зэхахьэхэм, концертхэм уахэлажьэ. Мыекъуапэ укъызэ­кIом культурэм иIофышIэмэ уаIукIагъэу къысэпIуагъ.

- Адыгеим культурэмкIэ ими­нистрэу Чэмышъо Гъазый сы­зырегъэблагъэм адыгэ шэн-­ха­бзэхэр лъэпкъ искусствэм къы­зэриухъумэхэрэм тытегущы­Iагъ. Дискэу къыситыгъэхэм адыгэмэ, тиреспубликэ яхьылIэ­гъэ къэбар гъэшIэгъонхэр ате­тха­гъэх. Ахэр Санкт-Петербург сызыкIожьыкIэ тилъэпкъэгъухэм, Iоф зыдасшIэрэмэ язгъэлъэ­гъущтых.

- Адыгэхэу Санкт-Петербург дэсмэ я Адыгэ Хасэ иIоф­шIэн пшIогъэшIэгъонэу ухэ­лажьа?

- БэшIагъэп ащ сыкIоу зысыублагъэр. Адыгэ Хасэм итхьа­­матэу Хьамхъукъо Бислъан цIы­фышIу, лъэпкъым ыгу фэузы. Къэбэртэе-Бэлъкъарым, Къэрэщэе-Щэрджэсым, нэмыкIхэми къарыкIыгъэ тилъэпкъэгъухэр Адыгэ Хасэм щызэIокIэх. Пчыхьэзэхахьэм орэд къыщысIуагъ.

- Классикэм ипроизведе­ниехэр тиныбжьыкIэмэ ашIо­гъэшIэгъонха?

- Къэшъонхэр, уджынхэр нахь якIас. Адыгэ орэдхэм къа­кIэ­упчIэх. «Гупшыс», «Синан», нэ­мыкIхэри тапэкIэ къэсIощтых. КъэшъокIо ансамблэ Адыгэ Хасэм щызэхащагъ, «Черкесия» фаусыгъ. ОрэдыIо ансамблэ джы зэхэтщэным тыпылъ. Къэбэр­-
тэе-Бэлъкъарым щыщ композиторэу Къэбэрдэкъо Муратэ нэIуа­сэ сыфэхъугъ. Концерт программэу дгъэхьазырыщтыр Санкт-Петербург, Москва, Темыр Кавказым къащытты тшIоигъу. ­Адыгэ орэдхэм ядэхагъэ тыди щызэхядгъэхыным тыпылъ.

- Тихэку упэчыжьэу опсэуми, угукIэ упэблагъ.

- Тиреспубликэ имэфэкIмэ сызэрахэлэжьэщтым пай нэмы­Iэми Мыекъуапэ сыкъэкIоныр шэнышIу сфэхъугъ. Тхьабысымэ Умарэ фэгъэхьыгъэ фестивалым сыкъырагъэблагъи, тилъэпкъ культурэ бай дэдэу зэрэщытыр джыри зэ зэрэслъэгъугъэм си­гъэгушIуагъ. Адыгэ Республикэм иныбжьыкIэмэ IэпыIэгъу афэ­хъурэ фондэу «Гуфэсым» истипендие къысаты. Фондым ипащэу Едыдж Мэмэт сыIукIагъ. Орэдым ишIуагъэкIи ныбжьыкIэу Урысыем ис тилъэпкъэгъумэ адыга­бзэр нахь дэгъоу зэрагъэ­шIэн зэралъэкIыщтым тытегу­щыIагъ.

- Филармонием исимфо­ническэ оркестрэ идирижерэу Петр Шаховыр къыпщыт­хъугъ.

- Петр Шаховым Iоф дэп­шIэн­кIэ IэшIэх. ТапэкIи концертхэм сахигъэлэжьэнэу къыси­Iуа­гъэшъ, программэр згъэхьазырыщт. Урысыем культурэмкIэ изаслуженнэ IофышIэу Къулэ Амэрбый, Адыгэ Республикэм икомпозиторхэм я Союз итхьа­матэу Къэгъэзэжь Байзэт Мые­къуапэ къыщыстыгъэ концертым еплъыгъэх, сценэм къытехьэхи къысфэгушIуагъэх. КультурэмкIэ министрэу Чэмышъо Гъазый фэ­багъэ зыхэлъ гущыIэхэр къыси­Iуа­гъэх. Ащ фэдэ пчыхьэзэхахьэ­мэ, зэIукIэгъумэ уапIу. Орэдым ишIуагъэкIэ щыIэныгъэр нахь дэгъоу къыбгурэIо. Филармонием идиректор шъхьаIэу Хъот Заури лъэшэу сыфэраз.

- Консерваториер къэуухынэу, угу рихьырэ искусствэм бэрэ уфэлэжьэнэу пфэсэIо.

- Тхьауегъэпсэу.

Сурэтым итхэр: Къэгъэзэжь Байзэт, КIыкI Соф, Петр Шаховыр филармонием щыкIо­гъэ концертым ыуж.