Мэзэ зытIу хъугъэу Мыекъуапэ изыгъэпсэфыпIэ парк гъэкIэжьын IофшIэнхэр щэкIох. Къэлэдэсхэр нахь макIэу зыщыдэхьэхэрэ кIымэфэ лъэхъаныр къызыфагъэфедэзэ, псэолъэшIхэм мыщ Iофыбэ щызэшIуахы: жъы хъугъэ чъыгхэу раупкIыгъэхэм къапыкIыгъэ къутамэхэр, лъэпсэжъхэр хьылъэзещэ автомашинэхэмкIэ дащых, лъэсрыкIо гъогухэм ателъыгъэ асфальт зэхэкъутагъэу къатырахыжьыгъэхэр чIыпIэ-чIыпIэу щызэхаугъуаех. Къыблэм тызэрэщыпсэурэм ишIуагъэкIэ кIымафэм къыхэфэгъэ мэфэ ошIухэр къызыфагъэфедэхэзэ зыфэгъэзэгъэ IофшIэнхэр чанэу псэолъэшIхэм агъэцакIэх.

Къалэм изыгъэпсэфыпIэ чIыпIэ шъхьа­Iэ зикIопIэ къэлэдэсхэм алъэгъугъэн фае гупчэ аллеем къыщашIыгъэ бгъэгъэ зэхэ­IулIагъэр. Паркыр гъэкIэжьыгъэнымкIэ планым къызэрэдилъытэрэм тегъэпсы­кIы­гъэу, мы чIыпIэм тикъалэ итеплъэ къэзы­гъэбаищт «орэд къэзыIорэ» фонтаныкIэм ишIын щырагъэжьагъ. Ом изытет емы­лъытыгъэу, чъыIи оси амыIоу Iоф ашIэзэ зэ­шIуахыгъэхэм джы нахьыбэу ахагъэхъон амал къытыщт бгъагъэм чIэтхэу проектым ыгъэнэфэрэ IофшIэнхэр агъэцэкIэнхэ зэралъэкIыщтым.

Къэлэ паркым игъэкIэжьын фэгъэзэгъэ генподряд организациеу ООО-у «АкваСтройСервис» зыфиIорэм ипащэу В. Мешалкиным къызэрэтиIуагъэмкIэ, мы мафэхэм заказчикэу щыт къэлэ админист­ра­цием къафигъэуцугъэ пшъэрылъым ­ди­штэу гъэкIэжьыгъэным епхыгъэ апэрэ чэзыур аухыгъ, паркым дэт шхапIэхэм якIолIэщт канализацие системэр агъэ­псыгъ. ПсырыкIуапIэхэр ахэм ящэлIэгъэн­хэм епхыгъэ IофшIэнхэр джыдэдэм зэ­шIуа­хых. Гупчэ аллеем плиткэхэр телъхьэгъэнхэм пае апэрапшIэ зэшIохыгъэн фэе Iофыгъохэр псэолъэшIхэм зэрахьэх. Генподрядчикым ипащэ теубытагъэ хэ­лъэу къыIуагъ IофшIэным епхыгъэ графи­кэу агъэнэфагъэм дэмыххэу псэолъэшIхэр зэрэлажьэхэрэр ыкIи ипIалъэм объектыр зэратыщтыр.

Непэ IофшIэнхэр зэрэзэхэщагъэхэм ыкIи анаIэ зытырагъэтын фэе лъэныкъо­хэм къэ­лэ администрацием щытегущы­Iагъэх. Къалэм ипащэу Михаил Черниченкэр ащ хэлэжьагъэти, пшъэрылъхэр къы­гъэуцугъэх, псэолъэшIхэм яIофшIэн кIэу­гъоягъэ хэлъэу зэрэзэхащэщтым ицыхьэ зэрэтелъыр къыIуагъ. ХигъэунэфыкIыгъ къэлэдэсхэм ыкIи Мыекъуапэ хьакIэу къакIохэрэм якIопIэ шъхьаIэу щыт паркыр гъэдэхэгъэным пае хэти шъхьэкIэ­фэ­ныгъэ къызыхигъэфэн зэрэфаер.

ЕЛБЭШЭ Руслъан.

Сурэтым итхэр: ООО-у «АкваСтройСервисым» ипащэу Валерий Мешалкиныр (гузэгум ит) фонтаным ишIын фэгъэзэгъэ псэолъэшIхэм ахэт.

Сурэтыр Iэшъынэ Аслъан къыты­рихыгъ.