Джырэблагъэ зэрэдунаеу щызэлъашIэрэ композиторэу Дж. Россини иоперэу «Итальянка в Алжире» зы­фиIорэр Москва апэрэу къыщатыгъ. Консерваторием и Залышху ар зыщыкIуагъэр. Дж. Россини ыцIэ чыжьэу зы­гъэIугъэ оперэм хэлэжьа­гъэх нахь мымакIэу дунаим щызэлъашIэрэ орэдыIохэу Лоренцо Регаццо (Италия), Роберто де Кандия (Италия), Давиния Родригес (Испа-
ния). Классикэр зикIасэхэмкIэ мыр хъугъэ-шIэгъэ инэу щыт. Тэр­кIэ ар тIо зэголъэу щыт
хъу­гъэ-шIагъ. Сыда пIомэ, ­Адыгэ Республикэм инароднэ артисткэу, УФ-м и Къэралы­гъо академическэ Театрэ­шхо исолисткэу Мамсыр Маргаритэ партие шъхьаIэр мы оперэм къыщишIыгъ.

Специалистхэм къызэрэ­хагъэщыгъэмкIэ, ащ ымакъэ екIоу, узIэпищэу едэIугъэхэм къалъигъэIэсыгъ. Ащ ишы­хьатых апэрэ пычыгъор заухым бэрэ Iэгу зэрэтеуагъэхэр ыкIи къэгъэгъабэу Маргаритэ къыратыгъэр. Нэужым Гупчэ гъэзет зэфэшъхьафхэм специалистхэм еплъыкIэу фыряIэр къащыхаутыжьыгъ. А зэпстэумэ ямызакъоу, концертым изэпыугъом Мамсыр Маргаритэ икомпакт-дискэу романс зэфэшъхьафхэр зытыритхагъэхэр къекIолIагъэхэм ащэфынэу амал яIагъ. Къыхэзгъэщымэ сшIоигъор, мы музыкальнэ альбомым ижъы­рэ адыгэ орэдэу «Мыхьамэт игъыбз» зыфиIорэр Марга-
ритэ къыIоу зэрэтетхагъэр ары.

Мы концертым орэдыIом иIэпэIэсэныгъэ, зэрэдунаеу ­исценэ зэфэшъхьафхэм къа­щиIоныр зэрифэшъошэ шъыпкъэр джыри зэ къыушыхьатыжьыгъ. Ащ фэдэу ыцIэ чыжьэу зыгъэIун, лъагэу зыIэ­тын ролыбэ тапэкIэ джыри къышIынэу тэри тыфэлъаIо.

ШЭНЫБЭ Ев.

АР-м и Представительствэу УФ-м и Президент дэжь щыIэм ипресс-секретарь.