ОАО-у «Псэолъэ конструкциехэмрэ машинэхэмрэ къыдэзыгъэкIырэ Вологод­скэ заводэу Адыгэкъа­лэ ия 40-рэ илъэс ыцIэкIэ щытым» икъутамэ бэмышIэу къуаджэу Хьалъэкъуае фельдшер-акушер пункт щигъэпсыгъ. Адыгэ Республикэм и Президентэу ТхьакIущынэ Аслъан къуаджэм июбилей зыщыха­гъэунэфы­кIырэм ехъулIэу хьалъэ­къуаехэм аритыгъэгъэ мылъкумкIэ ар ашIыгъ.

ПсынкIэу агъэпсырэ унэхэм яконструкциехэр къыдэзыгъэ­кIырэ заводэу «ВолДом» зыфи­Iоу илъэскIэ узэкIэIэбэжьымэ къызэIуахыгъэр непэ республикэм ипредприятиехэу анахьэу узыщыгугъынэу щытхэм ясатырэ хэуцуагъ. ОАО-у «Кубань­энергосбыт» зыфиIорэм икъутамэ пае ащ Адыгэкъалэ къатитIоу зэтет административнэ унэ ще­гъэпсы. Мы илъэсым предприятием ре­хъухьэ нэбгырэ 240-мэ ателъытэгъэ кIэлэцIыкIу Iыгъы­пIищрэ нэбгыри 120-мэ ате­лъытэгъэ зы кIэлэцIыкIу Iыгъы­пIэрэ къалэу Мыекъуапэ щи­шIынхэу. Ащ нэмыкIэу республикэм ирай­онищмэ технологиеу «МобиКон» зыфиIорэм тетэу фельдшер-акушер пунктиплI ащыгъэпсы­гъэнымкIэ Адыгэ Республикэм псауныгъэр къэу­хъумэгъэнымкIэ и Министерствэ дэгущыIэ.

- Регионым анахьэу къе­кIунэу щыт проектхэмкIэ Iэ­пыIэгъу ягъэгъотыгъэным те­гъэпсыхьэгъэ политикэр Адыгэ Республикэм и Президентэу ТхьакIущынэ Аслъан пхырещы. ПсынкIэу агъэпсырэ унэхэм яконструкциехэмрэ блок-контейнерхэу «МобиКон» зыфиIохэ-рэм афэдэхэмрэ къыдэзыгъэ­кIырэ заводыр Адыгэкъалэ щышIыгъэным дедгъаштэ зэ­хъум тэ тыкъызыпкъырыкIыгъэр непэ псэолъэшI отраслэм хэ­хъоныгъэ егъэшIыгъэным пае технологиякIэхэр, джырэ уахътэм диштэрэ шIыкIэхэр къызфэгъэфедэгъэн, кадрэхэм яIэпэ­Iэсэныгъэ зыкъегъэIэтыгъэн зэрэфаер ары. Республикэм ыкIи Къыблэ федеральнэ шъолъырым ащыпсэухэрэм нахь псынкIэу зыщыпсэущтхэ унэхэр ягъэгъотыгъэнхэм иамал мы предприятием къытыщт, - къыIуагъ Адыгэ Республикэм и Премьер-министрэу КъумпIыл Мурат.

ОАО-у «ВолДом» зыфиIорэм псынкIэу агъэпсырэ унэхэм апае псэолъэ конструкциехэу «ВолДом», мобильнэ унэхэм апае блок-контейнерхэу «МобиКон» зыфиIохэрэм якъыдэгъэкIынкIэ амалэу иIэхэр зэкIэ къызфигъэ­федэу ригъэжьагъ. Непэ ехъулIэу мы предприятием сомэ миллион 21,6-рэ хъурэ хэбзэIахьхэр бюджетхэм афигъэкIуагъ. Республикэм щыпсэурэ нэбгыри 140-мэ мыщ Iоф щашIэ, гу­рытымкIэ ахэм мазэ къэс лэ­жьапкIэу сомэ мин 16 фэдиз къагъахъэ.

Республикэм ипащэхэм яшIошIкIэ, гухэлъ гъэнэфагъэм тегъэпсыхьэгъэ республикэ
программэхэу «2006 - 2010-рэ илъэс­хэм Адыгэ Республикэм щыпсэурэ унэгъо ныбжьыкIэ-хэм унэхэр ягъэгъотыгъэнхэр», «2003 - 2010-рэ илъэсхэм къуа­джэм социальнэ хэхъоныгъэ егъэшIыгъэныр» зыфиIо­хэрэр агъэцакIэхэ зыхъукIэ, джащ фэдэу ипотекэ чIыфэ­тынымкIэ предприятием ипродукцие жъу­гъэу къызфагъэфедэн алъэ­кIыщт. Ащ епхыгъэу Адыгэ Республикэм имуниципальнэ образова­ниехэм яадминистрациехэм япащэхэм анаIэ тырарагъэдзагъ мы программэхэм адиштэу субси­диехэр къазыфатIупщыхэкIэ, республикэм щыпсэухэрэм унэхэр ягъэгъотыгъэнхэмкIэ Iофхэм язытет хэпшIыкIэу нахьышIу ашIын зэралъэкIыщтым.

ГущыIэм пае, гухэлъ гъэнэфагъэ зиIэ республикэ программэу «2006 - 2010-р илъэсхэм Адыгэ Республикэм щыпсэурэ унэгъо ныбжьыкIэхэм унэхэр ягъэгъотыгъэнхэр» зыфиIорэм диштэу мы илъэсым Адыгэ Республикэм ибюджет сомэ миллиони 5, муниципальнэ бюджетхэм - сомэ миллиони 8,5-рэ фэдиз, федеральнэ бюджетым - сомэ миллион 40 фэдиз къыхагъэ­кIынэу рахъухьэ. Мы программэм тетэу унэгъо ныбжьыкIэ 50 фэдизмэ псэукIэ амалэу яIэхэр нахьышIу ашIын алъэкIыщт. Программэу «2003 - 2010-рэ илъэсхэм къуаджэм социальнэ хэхъоныгъэ егъэшIыгъэныр» зыфиIорэм диштэу 2009-рэ илъэ­сым унэгъо ныбжьыкIэхэу ыкIи специалист ныбжьыкIэхэу
къуаджэхэм ащыпсэухэрэм унэ ягъэгъотыгъэным пае сомэ миллион 30-м ехъу къафыхагъэ­кIыгъагъ. 2011-рэ илъэсым нэс ащ фэдэ гухэлъхэм джыри сомэ миллиони 147-рэ апэIуагъэ­хьанэу рахъухьэ.

Ипотекэм непэ Адыгеим зыщеушъомбгъу. 2009-рэ илъэсым икIэуххэмкIэ ипотекэ чIыфэтынымкIэ агентствэм сомэ миллион 438-м ехъурэ чIыфэ 342-рэ унэ ращэфынэу аритыгъ.

Заводэу «ВолДом» зыфиIо-рэм итехнологие къызыфагъэфедэзэ, Мыекъопэ районым турист отраслэм зыщырагъэушъомб­гъунэу, хьакIэщ комплекс цIыкIухэр, инфраструктурэм инэмыкI объектхэр ащ щагъэпсынэу рахъухьэ. А пстэумэ яшIуагъэкIэ охътэ кIэкIым къыкIоцI республикэм къеблэ­гъэрэ хьакIэхэр мыщ щыпсэун­хэмкIэ амалэу щыIэхэр нахьы­шIу хъунхэу мэгугъэх.

Адыгэ Республикэм и Президент ипресс-къулыкъу