ЦIыфхэр социальнэу къэухъумэгъэнхэм икъулыкъоу республикэм щызэхэщагъэм иучет мы лъэхъаным нэбгырэ мин 70-м ехъу хэт. Ахэм фэгъэкIотэныгъэу яIэхэм, хэгъэгум ыпашъхьэ гъэхъагъэу щыряIэхэм ялъытыгъэу ахъщэ IэпыIэгъу зэфэшъхьафхэр къэралы­гъом къаретых. Адыгеим щыпсэурэ нэбгырэ мин 37-м ащ фэдэ ахъщэ IэпыIэгъоу къаратырэр федеральнэ бюджетым къыхахы. Ахэм ахэхьэх Хэгъэгу зэошхом иветеранхэр, чIыпIэ «плъырхэм» ащыIэгъэ ветеранхэр, радиацием зэрар зэрихыгъэхэр, донорхэр, нэмыкIхэри.

Мыхэм анэмыкIэу социальнэ IэпыIэгъу зэратырэ нэбгырэ мин 40-м ехъоу Адыгеим щыпсэухэрэм апэIухьэрэ мылъкур республикэ бюджетым къыхагъэкIы. Ахэм ахэхьэх Iоф­шIэным иветеранхэр (нэбгырэ 32759-рэ), Хэ­гъэгу зэошхом илъэхъан тылым щылэжьагъэ­хэр (нэбгырэ 5810-рэ), политическэ репрессиехэм къахиубытэгъагъэхэр (нэбгырэ 1621-рэ). Адыгэ Республикэм и Законэу ­«Адыгэ Республикэм щыпсэурэ цIыф куп гъэнэфагъэхэм социальнэ IэпыIэгъу ягъэгъоты­гъэным фэгъэхьыгъ» зыфиIорэм къызэрэди­лъытэу, мыхэм зэкIэми мазэ къэс ахъщэ Iэ­пыIэгъу гъэнэфагъэ афатIупщы, коммунальнэ фэIо-фашIэхэм апэIухьэрэ ахъщэм щыщ Iахь къафырагъэгъэзэжьы, ыпкIэ хэмылъэу цэхэр афашIынхэм ифитыныгъи яI.

Адыгэ Республикэм IофшIэнымкIэ ыкIи ­со­циальнэ хэхъоныгъэмкIэ иминистрэ къы­зэ­рэтиIуагъэмкIэ, мы ыпшъэкIэ зигугъу къэт­шIы­гъэ цIыф купхэм, нэмыкIхэу социальнэ Iэпы­Iэгъу зэратыным ифитыныгъэ зиIэхэм яфэ­Iо-фа­шIэхэм ягъэцэкIэн илъэсым къыкIоцI сомэ миллиард пэIохьэ, министерствэм иилъэс бюджет зэрэхъурэр сомэ миллиардрэ мин 400-рэ.

ЖАКIЭМЫКЪО Аминэт.