Къэбэртэе-Бэлъкъарым инароднэ сурэтышIэу, СССР-м исурэтышIмэ я Союз 1973-рэ илъэсым къыщыублагъэу хэтэу, Урысыем ихудожественнэ академие, Европэм ихудожественнэ академие ахэтэу, Дунэе Адыгэ Академием ичлен-корреспондентэу КIыщ Мухьадин исурэтхэм якъэ­гъэлъэгъон Мыекъуапэ къыщызэIуахыгъ.

КъокIыпIэм щыпсэурэ лъэпкъхэм я Къэралыгъо музей икъутамэу Мыекъуапэ дэтым сурэты­шIэ цIэрыIом иIофшIагъэ игъэкIо­ты­гъэу къыщыгъэлъэгъогъэным фэ­гъэхьыгъэ зэхахьэм къыщыгу­щы­Iа­гъэх Адыгэ Республикэм и Премьер-министрэу КъумпIыл Муратэ, АР-м и Парламент и Комитет итхьаматэу УдыкIэко Юрэ, Урысыем инароднэ сурэтышIэу Къат Теу­цожь, сурэтышI цIэрыIоу Виталий Карабейниковыр, АР-м щызэлъа­шIэрэ сурэтышIхэу Бырсыр Абдулахь, Еутых Асе, КъокIы­пIэм щы­псэурэ лъэпкъхэм ямузей икъутамэ идиректорэу Кушъу Нэфсэт, су­рэтышIэу КIыщ Мухьадин ишъхьэ­­гъусэу Жаклин, нэмыкI­хэри.

Къэгъэлъэгъоным икъызэIухын хэлэжьагъэх Адыгэ Республикэм культурэмкIэ иминистрэу Чэмы-
шъо Гъазый, ащ иIофшIэгъухэр, Краснодар краим иадминистрацие ипащэ илIыкIоу Адыгэ Республикэм щыIэ Николай Пивоваровыр, культурэмрэ гъэсэныгъэмрэ яIофышIэхэр, общественнэ организациехэм ялIыкIохэр.

КIыщ Мухьадин итворчествэ дунаим щызэлъашIэ, Урысыем и Къэралы­гъо Третьяковскэ къэгъэ­лъэ­гъуа­пIэ, Къэбэртэе-Бэлъкъарым, ­Краснодар краим, Адыгэ Республикэм, джащ фэдэу Испанием ипачъыхьэ иунагъо, нэмыкI унэе къэгъэлъэгъонхэм  ащыплъэгъунхэ плъэ­кIыщт.

КъокIыпIэм, КъохьапIэм, фэ­шъхьафхэми ящыIэкIэ-псэукIэ М. КIыщыр ащыгъуаз. «Сурэты­шIым ицIыфхэр», «Уахътэр къэбгъэуцун плъэкIыщтэп» зыфиIорэ темэ хэхыгъэхэмкIэ къэгъэлъэ­гъон гъэшIэгъонхэр зэхищагъэх. Сурэт пэпчъ гупшысэ гъэнэфагъэ хэлъ. Исурэтхэм дунаир къызэраIотэрэ шIыкIэмкIэ Кавказ шъолъырым ар зэрэщапIугъэр къыхэщы.

- Адыгэмэ шыхэр якIасэх, - еIо КIыщ Мухьадинэ. - Адыгэ шъуашэу зетхьэрэмкIэ дунаим тет лъэпкъмэ такъыхэщы. Сисурэтхэр Урысыем икъэлэшхомэ къаща­гъэлъагъоуи уахътэ къысэкIугъ. Адыгеим зэкIэми анахь дахэу къы­щыспэгъокIыгъэхэу сэлъытэшъ, Премьер-министрэу КъумпIыл Му­ратэ, культурэмкIэ министрэу Чэмышъо Гъазый, музеим идиректо­рэу Кушъу Нэфсэт, нэмыкI­хэми лъэшэу сафэраз.

Уахътэр къызэтебгъэуцон зэрэ­мылъэкIыщтым, тыкъэзыуцухьэрэ дунаим ирэхьатныгъэ цIыфым гукIэ зэрилъэгъурэм, адыгэ шъуа­шэмрэ бзылъфыгъэхэм яобразхэмрэ сурэтхэмкIэ къызэриIо­тэ­рэ шIы­кIэм щыIэныгъэм ухещэшъ, уиупчIэмэ джэуапхэр къаритыжьэу къыпщэхъу.

Искусствэр зикIасэхэу СтIашъу Юрэ, МэщфэшIу Нэдждэт, Пэнэ­шъу Руслъанэ, Шэуджэн Джансурэ, Еутых Асе, Абыдэ Иринэ, нэ­мыкIхэми къы­таIуагъэр лъэпкъ шIэжьыр зыгъэ­лъэшырэ гупшысэх. Адыгэ къэралыгъо университетым иансамблэу «Жъыум» ижъырэ орэдхэр музеим къыщи­Iуагъэх. Лъэпкъ къэшъо мэкъа­мэхэр артистхэм къызыхадзэхэм, АР-м куль­турэм­кIэ иминистрэу Чэмышъо Гъазый, КIыщ Му­хьадинэ ишъхьэ­гъусэу Англием къыщыхъугъэ Жаклинэ, су­рэ­тышI цIэрыIохэу КIыщ Мухьадинрэ Еутых Асерэ, МэщфэшIу Нэдждэт, нэмыкIхэми адыгэ къашъохэр къашIыгъэх.

Премьер-министрэу КъумпIыл Муратэ, Парламентымрэ Правительствэмрэ якъулыкъушIэхэм су­рэтхэм защагъэгъозагъ. Музеим иIо­фышIэу Сулеймэн Фатимэ су­рэтышIэу КIыщ Мухьадинэ итворчествэ  хьакIэмэ къафиIотагъ.

Сурэтхэр зэхахьэм къыщы­ты­рахыгъэх