ШIэныгъэлэжь ныбжьы­кIэхэм яя VII-рэ Дунэе научнэ конференциеу «Наукэр. Гъэсэныгъэр. НыбжьыкIэхэр» зыфиIорэр тыгъуасэ Адыгэ къэралыгъо университетым къыщызэIуахыгъ. Зигугъу къэт­шIыгъэ апшъэрэ еджапIэр загъэпсыгъэр илъэс 70-рэ зэрэхъурэм ипэгъокIэу Iофтхьабзэр зэхащагъ.

Урысыем икъэлэ 30-м ехъу­мэ, Казахстан, Украинэм, Тыркуем, нэмыкIхэми къарыкIы­гъэ лIыкIохэр мыщ хэлэжьэ­щтых.

- Тинеущырэ мафэ зыфэдэщтыр бэкIэ зэпхыгъэ ныб­жьыкIэхэр непэ дунаим къыщыхъурэ зэхъокIыныгъэхэм зэкIэми чанэу ахэлэжьэнхэ фае, - къыщиIуагъ АКъУ-м иректорэу Р.Хъунагом ипэублэ псалъэ. - Ащ дакIоу, общественнэ щыIакIэм чIыпIэшхо щызыубытырэ наукэм изытет бэкIэ епхыгъ экономикэм хэ­хъоныгъэу ышIыщтыр. Ащ пае шIэныгъэ куу зыIэкIэлъ ныб­жьыкIэхэр тищыкIагъэх. Тиапшъэрэ еджапIэхэм непэ аIут докторхэм, профессорхэм яIофшIагъэ шIэныгъэлэжь ныбжьыкIэхэм лъамыгъэ­кIуатэмэ, неущырэ мафэр зыфэдэщтыр къэшIэгъуаеп. Тэ тиуниверситет пштэмэ, мы аужырэ илъэсхэм ащ хэхъоныгъэ­шIухэр зэришIыгъэм щэч хэ­лъэп. ЫпэкIэ аспирантурэм чIэсхэм диссертациер атхыным пае Москва, нэмыкI къалэхэм загъэзэн фэягъэмэ, джы непэ тэ тинаучнэ библиотекэ къызэIутхын тлъэкIыгъэ.
2009-рэ илъэс закъом сомэ миллиони 10-м ехъу зытефэрэ оборудование къэтщэфыгъ. Джащ фэдэу федеральнэ целевой программэхэм къадыхэ­лъы­тагъэу тишIэныгъэлэжь ныбжьыкIэхэр, студентхэр конференциехэм, олимпиадэхэм ахэлажьэх, гъэхъэгъэшIухэри ашIых. Урысыем имызакъоу, IэкIыб къэралхэм ащыIэ апшъэ­рэ еджапIэхэм зэпхыныгъэу адытиIэр тэгъэпытэ. Непэрэ Iофтхьабзэм хэлэжьэнэу къекIолIагъэхэм зэкIэми ягухэлъышIухэр къадэхъунхэу, наукэм чIыпIэ гъэнэфагъэ щау­бытынэу афэсэIо.

Нэужым конференцием ипрограммэ къыдыхэлъытагъэу секцие зэфэшъхьафхэмкIэ IофшIэныр лъагъэкIотагъ.

ЗэхэщакIохэм зэрагъэнэфа­гъэмкIэ, Iофтхьабзэм изэфэ­хьысыжьхэр непэ ашIыщтых, анахь дэгъухэм дипломхэр афагъэшъошэщт. ХьакIэу Адыгеим къеблэгъагъэхэр Мые­къопэ районым ащэщтых, тичIыопс идэхагъэ нэIуасэ фашIыщтых.

ТХЬАРКЪОХЪО Адам.