Предмет зэфэшъхьафхэмкIэ Всероссийскэ олимпиадэм иреспубликэ уцугъо Адыгэ Республикэм щыкIуагъ. ЗэкIэмкIи предмет 19-кIэ олимпиадэхэр зэхащэгъагъэх. Аужырэр (адыгабзэмкIэ) мэзаем и 3-м кIуагъэ. Ащ икIэуххэм тазыкIэупчIэм, джыри мыхьазырхэу къычIэкIыгъ. Ау адрэ предметхэмкIэ зэфэхьысыжь кIэкIхэм шъуащыдгъэгъозэщт.

Урыс литературэмкIэ олимпиадэм анахь шIэныгъэ дэгъухэр Мыекъуапэ икIэлэеджа­кIохэм къыщагъэлъэгъуагъ, апэрэ чIыпIэр аубытыгъ. Анахь баллыбэ къэзыхьыгъэ кIэлэеджа­кIохэм ащыщых (я 9-рэ классхэмкIэ) Виктория Беседа, (я 10-рэ классхэмкIэ) Афэунэ Данэ, (я 11-рэ классхэмкIэ) Анастасия Задорожнаяр.

Мыекъуапэ щыщ Тхьагъэпсэу Иляс инджы­лы­зыбзэмкIэ анахь Iазэу олимпиадэм щыха­гъэунэфыкIыгъ.

ГеографиемкIэ анахь дэгъур къыхэхыгъоягъ. Я 9-рэ классхэмкIэ апэрэ чIыпIэр зэдагощыгъ МыекъуапэкIэ Владимир Чуриловымрэ Кощхьэблэ районым щыщ Мэрэтыкъо Маргари­тэрэ.

Я 10-рэ классхэмкIэ Теуцожь районым къикIыгъэ Шъынэхъо Азэматрэ Кощхьэблэ районымкIэ Мэрэтыкъо Заретэрэ анахь дэгъу­хэу алъытагъэх.

КомандэхэмкIэ апэрэ чIыпIэр Кощхьэблэ районым ыубытыгъ, ятIонэрэ чIыпIэр - Мые­къопэ, ящэнэрэр Красногвардейскэ районхэм афагъэшъошагъэх.

ФизикэмкIэ олимпиадэм хэлэжьагъэхэм зэкIэмэ лъэшэу апэ ишъыгъ Мыекъопэ лицееу N 8-м икIэлэеджакIоу Андрей Лобовыр. Мые­къуапэ икомандэ апэрэ чIыпIэр ыубытыгъ.

Олимпиадэхэм якIэуххэм нахь игъэкIотыгъэу шъуащыдгъэгъозэщт.

Сихъу Гощнагъу.