Дунаим щыпсэоу «свиной гриппыр» къызэузыгъэхэм япчъагъэ зэрэхэхъуагъэм къыпкъыры­кIыхэзэ, а узым пэуцу­жьыгъэным епхыгъэ Iофтхьабзэхэм язехьан фэгъэзэгъэ чIыпIэ комитет Адыгэ Республикэм и Премьер-министрэ игуадзэ икIыгъэ илъэсым ыгъэнэфэгъагъ. Джащ фэдэу ащ Iоф зэришIэщт планри ыухэсыгъ.

ЧIыпIэ комитетым пэшIорыгъэшъэу къылъытагъ республикэм щыпсэурэ пчъа­гъэм елъытыгъэу сымэджэн ылъэкIыщтыр зыфэдизыр, ащ  къыхэкIэу сымэджэщхэм чIы­пIэу ящыкIэгъэщтыр, Iэзэгъу уцэу зыщыкIэщтхэр, мы лъэ­хъаным аптекэхэм, аптечнэ базэхэм яIэр зыфэдэр ыкIи зыфэдизыр.

Роспотребнадзорым Адыгэ РеспубликэмкIэ и ГъэIорышIа­пIэрэ шIэныгъэмрэ гъэсэны­гъэм­рэкIэ Министерствэмрэ зэгъусэхэу унашъо ашIыгъ зэпахырэ узыр къызэутэкIынхэм ищынагъо нахь зышъхьарыт купхэм Iофэу адэшIэгъэн фаем епхыгъэу. Джащ фэдэу республикэ семинар-зэIукIэхэр IэзэпIэ-профилактическэ учреждениехэм яIофышIэхэм мыхэм афызэхащагъэх. Ахэр афэгъэхьы­гъагъэх мы запахырэ узыр къы­зэу­тэкIыгъэхэм зэряIэзэщтхэм, диагнозыр зэрэбгъэуцущтым. Мы лъэныкъомкIэ Iоф зышIэщт специалист 52-рэ агъэхьазырыгъ.

Роспотребнадзорым и Гъэ­IорышIапIэу «Причерномор­ская противочумная станция» зыфиIорэм иIофышIэхэр яIэ­пыIэгъоу республикэм щагъэхьазырыгъэ специалист 78-мэ япшъэрылъыр а зэпахырэ узым зимыушъомбгъуным епхыгъэ профилактикэ Iотхьабзэхэм язехьан ары. Джащ фэдэу «свиной гриппым» пэуцужьыгъэным пае пшъэрылъ гъэнэфа­гъэхэр зиIэ специалистхэр а семинар-зэIукIэхэм ащагъэхьазырыгъэх.

Адыгэ Республикэм псауныгъэр къэухъумэгъэнымкIэ и Министерствэ къызэрэщыта­Iуа­гъэмкIэ, гъэсэныгъэм иучреждениеу республикэм итхэм япащэхэм игъоу афалъэгъугъ зэпахырэ узхэм кIэлэцIыкIухэр нахь ащыухъумэгъэнхэм фэшI ахэр бэу зыхэлэжьэнхэ фаеу хъурэ Iофтхьабзэхэр нахь макIэ шIыгъэныгоу.

Лъэпкъ проектэу «Псауныгъ» зыфиIорэм къызэрэди­лъытэщтыгъэмкIэ, икIыгъэ илъэсым нэбгырэ мин 80 вакцинацием къыхырагъэубытэнэу щытыгъ, ахэм ащыщэу 18500-р - кIэлэцIыкIух. А Iофтхьабзэм къыхырагъэубытагъэр нэбгырэ 83197-рэ (республикэм щыпсэурэм ипроцент 18,9-рэ).

Урысыем псауныгъэр къэу­хъумэгъэнымкIэ ыкIи социальнэ хэхъоныгъэмкIэ и Министерствэ унашъо зэришIыгъэу, «свиной гриппыр» къяутэкIыным ищынагъо нахь зышъхьарыт цIыф купхэр къэгъэнэфэгъэнхэм ыкIи ахэм «живая пандемическая вакцина» зыфаIорэр ахэлъхьэгъэныр республикэм щызэшIуахыгъ. Общественнэ траспортым, коммунальнэ фэIо-фашIэхэр зыгъэцакIэ­хэрэм, цIыфхэм нахьыбэрэ ахэхьэрэ IофышIэ купхэм а вак­цинэр ахалъхьагъ (нэбгырэ 2082-рэ). Джащ фэдэу икIыгъэ илъэсым ыкIэхэм вакцинэ дозэ 4164-рэ джыри республикэм къыIукIагъ, тIогъогогъо ахалъ­хьа­ным пае. Тыгъэгъазэм и
12-м ехъулIэу нэбгырэ 2079-мэ (планэу яIагъэм ипроцент
99,8-рэ) ар ахалъхьагъ.

ЖакIэмыкъо Аминэт.