УФ-м исуд приставхэм якъулыкъу АР-мкIэ и ГъэIо­рышIапIэ блэкIыгъэ 2009-рэ илъэсым Iофэу ышIагъэр зыщызэфахьысыжьыгъэ игъэ­кIотыгъэ зэхэсыгъо тыгъуасэ, мэзаем и 4-м, иIагъ. Ащ АР-м и Правительствэ, Апшъэрэ ыкIи Арбитражнэ судхэм, прокуратурэм, Роспотребнадзорым, УФ-м пенсиехэмкIэ и Фонд и Къутамэу АР-м щыIэм, правоохранительнэ орган зэфэшъ­хьафхэм ялIыкIохэр хэл­э­жьа­гъэх.

Зэхэсыгъор къызэIуихыгъ ыкIи зэрищагъ УФ-м исуд приставхэм якъулыкъу АР-мкIэ и ГъэIорышIапIэ ипащэу Бра­къый Аслъан. БлэкIыгъэ илъэ­сым Iофэу ашIагъэм, къихьэгъэ 2010-рэ илъэсым иапэрэ мэзих къыкIоцI зэшIуахынэу рахъу­хьа­гъэм афэгъэхьыгъэ доклад игъэкIотыгъэ ащ къышIыгъ. КъызэриIуагъэмкIэ, зэшIуахын фаеу суд приставхэм пстэумкIи Iоф 242571-рэ блэкIыгъэ илъэ­сым къаIэкIэхьагъ. Ар, 2008-рэ илъэсым егъэпшагъэмэ, мин 52-кIэ нахьыб. Ахъщэу а IофхэмкIэ къаугъоижьын фаеу щытыгъэр сомэ миллиарди 2-рэ миллиони 109-рэ мэхъу. Ащ фэдиз мылъку къаIахыжьын фаеу джырэ нэс къызэрэхэ­мыкIыгъэр Бракъый Аслъан къыIуагъ. Iофэу суд приставхэм аухыгъэр зэкIэмкIи 174927-рэ мэхъу, ащ щыщэу агъэцэкIагъэр 139254-р ары. ПстэумкIи къаугъоижьыгъэ сомэ миллион 263594-м щыщэу сомэ миллиони 126-р бюджет зэфэшъхьафхэм ахалъхьа­жьыгъ. Iофэу къаIэкIахьэрэр илъэс къэс мин пчъагъэкIэ нахьыбэ зэрэхъурэм, кадрэхэм макIэу зэрахахъорэм къахэкIэу, суд приставхэм атегъэуагъэ хъурэр шапхъэхэм бэкIэ ашIокIы. Арэу щытми, пшъэрылъэу яIэхэр игъом ыкIи икъоу зэрагъэцэкIэщтым пы­лъых. ГъэIорышIапIэм иотделэу районхэмрэ къалэхэмрэ ащыIэхэм Iофэу ашIагъэр зэригъапшэзэ, лъэныкъо зэ­фэшъхьафхэмкIэ пэрытныгъэр блэкIыгъэ илъэсым зыубытыгъэхэр ГъэIорышIапIэм ипащэ къыхигъэщыгъэх. Къи­хьэгъэ илъэсми Iофэу къаIэ­кIахьэрэр игъом ыкIи икъоу агъэцэкIэныр, къэкIуапIэу яIэхэр нахьыбэу федэ къахьэу агъэпсэолъэнхэр, технология­кIэу щыIэныгъэм къыздихьыхэрэр нахьыбэу къызыдыра­гъэIэнхэр пшъэрылъ шъхьаIэу зэрэзыфагъэуцужьырэр ащ къыкIигъэтхъыгъ.

Нэужым зыфэгъэзэгъэ лъэ­ныкъохэмкIэ зэшIохыгъэ хъу­гъэхэм афэгъэхьыгъэ докладхэр ГъэIорышIапIэм ипащэ игуадзэхэм къашIыгъэх, Iофыгъоу щыIэхэм, къихьэгъэ илъэсым анахьэу анаIэ зытырагъэтын фаехэм атегущыIа­гъэх.

Зэхэсыгъом икIэухым ипшъэ­рылъхэр анахь чанэу зэшIозы­хыгъэ отделхэмрэ приставхэмрэ наградэ зэфэшъхьафхэмкIэ къыхагъэщыгъэх.

ХЪУТ Нэфсэт.