Адыгэ Республикэм и Президентэу ТхьакIущынэ Аслъан дунаим щызэлъашIэрэ сурэ­тышIэу КIыщ Мухьадинрэ ащ ишъхьэгъусэу ыкIи имене­джерэу Жаклин Диана Моссрэ тыгъуасэ зэIукIэгъу ады­риIагъ.

СурэтышI цIэрыIом ыныбжь ­илъэс 70-рэ зэрэхъурэм ипэгъокIэу иIофшIа­гъэхэр КъокIыпIэм щыпсэурэ лъэпкъхэм я Къэралыгъо музей икъутамэу Мыекъуапэ дэтым къыщагъэлъэгъуа­гъэх. Ащ кIэщакIо фэхъугъ зыцIэ къетIогъэ музеим ипащэу Кушъу Нэфсэт. Мы аужырэ илъэсипшIым ехъум М.КIыщыр Испанием щэпсэу ыкIи Iоф щешIэ. Урысыем имузейхэм ямыза­къоу, IэкIыб къэралхэми ащ иIоф­шIагъэхэр ащыбгъотынхэ плъэкIыщт, дунаим нахь щызэлъашIэрэ сурэт­ышI­хэм ясатыр пытэу хэуцуагъ. Илъэс заулэрэ къалэу Лондон щылэжьагъ.

- Адыгэ лъэпкъым икультурэ ибаи­ныгъэ чыжьэу зыгъэIугъэ КIыщ Мухьадинэ иIофшIагъэхэм осэшхо афэ­пшIынэу, мыр адыгэ лъэпкъым къызэрэхэкIыгъэм урыгушхонэу щыт, IэкIыбым щэпсэу нахь мышIэми, ипро­изведениехэм лъэпкъ нэшанэр сыди­гъуи ахэолъагъо, - къыIуагъ Тхьа­кIу­щынэ Аслъан.

ТапэкIи сурэтышI цIэрыIор республикэм къеблагъэмэ зэригопэщтыр, зэ­пхыныгъэу зэдыряIэр гъэпытэгъэным мэхьанэшхо зэриIэр Президентым къы­хигъэщыгъ. Адыгеим къэкIогъэ хьа­кIэм ежь ыцIэкIэ тхылъхэр шIу­хьаф­тынэу фишIыгъэх.

- СиIофшIагъэхэр къызыщызгъэ­лъэгъогъэ музеим иIофышIэхэм, республикэм ипащэхэм лъэшэу сафэраз, - къыIуагъ КIыщ Мухьадинэ. - Адыгеим щыпсэурэ цIыфхэр гуфэбэныгъэ хэлъэу, дахэу къызэрэтпэ­гъокIы­гъэхэр тщыгъупшэщтэп. Амал зэриIэу тапэкIи республикэм тыкъакIозэ тшIыщт, искусствэр шIу зылъэгъухэрэр дгъэгушIонхэм тыпылъыщт.

ТХЬАРКЪОХЪО Адам.

КIыщ Мухьадинэ иIофшIагъэхэм якъэгъэлъэгъон фэгъэхьыгъэ тхыгъэ я 12-рэ нэкIубгъом ит.